Təxminən 8 il əvvəl Bakıya gətirilən yeni avtobuslarda yeni monitorların quraşdırılması barədə xəbərlər var idi. Quraşdırıldı da...
Lakin hazırda avtobusların çoxunda bəh-bəhlə qoyulan bu monitorların demək olar ki, əksəriyyəti çalışmır və insanlara onların bir bəzək əşyası kimi olduqları təssüratı yaradır.
Səyahət etməyin asan olduğu bir dönəmdə demək olar ki, vətəndaşlarımızın əksəriyyəti ömründə bir dəfə də olsa vətəndən kənara ayaq basıb. Bu zaman turistin yad bir şəhərdə azmaması üçün avtobuslarda, dayanacaqlarda olan monitorların ən çətin anlarında köməklərinə çatmasının şahidi olublar. Lakin bu Bakıya səyahət edən turistlərin, həmçinin şəhər sakinlərinin ən əlçatmaz xəyallarına çevrilib.
Çünki avtobuslarda çalışan manitorlara deyəsən nadir hallarda rast gəlmək olur.
Səbəblər, həll olunmayan problemlər...
Bu monitorların çalışmamasına əsas səbəb isə sıradan çıxdıqları zaman təmir olunmaması göstərilir. Nəticədə isə monitorlar sıradan çıxır və sərnişinlər ondan istifadə edə bilmir.
Bu vəziyyətdən şikayətçi olan bir oxucumuzun redaksiyaya yolladığı video materialda da yaranan problemləri açıq şəkildə görmək olur. 205 saylı avtobusda çəkilən görüntüdə avtobusun monitorunun nasaz olması əks olunub. Əslində isə dayanacaqların adları qeyd edilən bu yazı lövhəsinin işi bizi məlumatlandırmaqdır. Belə olan halda sərnişin gedəcəyi yeri dəqiq bilmirsə kimdənsə soruşmağa məcburdur.
Bəs, bu cihazların monitorinqi niyə aparılmır?
Nəqliyyat eksperti Elməddin Muradlının sözlərinə görə, proses Bakı Nəqliyyat Nazirliyinin vaxtından başlansa da indi cavabdeh qurum bu işlərə yaxşı nəzarət etmir. O, bu barədə Ednews-a açıqlması zamanı deyib.
“Düşünürəm ki, bu texnologiyaları yeniləmək lazımdır. Əslində onların yenilənməsi üçün kifayət qədər vəsait sərf olunub. Sadəcə, zamanında işin təməli düzgün qoyulmalı idi. Nəticə etibarilə bu gün nə etsək faydalana bilmirik. İstər avtobuslarda,istər dayanacaqlarda olan informasiya manitorları mərkəzdən idarə olunur. Mərkəz də elə qurulmalı idi ki, orda olan mütəxəssislər on il, iyirmi il sonra oranı yenidən söküb yığmaq deyil, yeniləmək zərurəti yarada bilsinlər”.
Ekspertin fikrincə, bu cihazlar birbaşa Bakı Nəqliyyat Agentliyi (BNA) tərəfindən tənzimləməli və daima nəzarətdə saxlanılmalıdır.
“Hazırda yol polislərin səlahiyyətinə intelektual mərkəz, BNA-ya isə avtobuslar verilib. Zaman bu qurumların o mərkəzlərlə hansı formada əməkdaşlıq edəcəklərini və problemlərin həllində nə kimi fəaliyyətləri olacaqlarını göstərəcək. Mənim fikrimcə, hər bir halda vahid dispetçer xidməti fəaliyyət göstərməlidir. Belə problemlərin qarşısı insan əli dəymədən mərkəzdən idarə olunan süni intelektlə alınmalıdır”.
Məsələyə aydınlıq gətirmək üçün əvvəlcə BNA-nın mətbuat xidməti ilə əlaqə yaratdıq. Qurumdan bildirdilər ki, avtobuslardakı monitorlar onların səlahiyyətində deyil və problemlə bağlı bizə birbaşa “Baku Bus” şirkəti ilə əlaqə yaratmağımızı tövsiyyə etdilər.
“Baku Bus” şirkətinin mətbuat katibi Qabil Babayev isə Ednews-a açıqlamasında monitorun yalnız həmin avtobusda işləmədiyini deyib.
“08.04.2022-ci il tarixində saat 18:58-də Abbas Mirzə Şərifzadə küçəsi ilə 205 nömrəli marşrut xətti üzrə iki avtobus hərəkətdə olub. Nasazlıqla əlaqədar monitora texniki baxış keçirilib və həmin cihaz yenisi ilə əvəzlənib. Hazırda 205 nömrəli marşrut xətti üzrə hərəkət edən bütün avtobusların salonundakı monitorlar işləyir”.
Şirkət rəsmisi, həmçinin qeyd edib ki, avtobuslar hər gün qarajda texniki baxışdan keçirilir.
“Bu zaman salondakı monitorlarda yoxlanılır və onlar daima diqqətdə saxlanılır. Gün ərzində hər hansı bir avtobusun salonundakı monitorda nasazlıq aşkarlanarsa, dərhal problemin aradan qaldırılması üçün tədbirlər görülür. Nasazlığı tez bir zamanda aradan qaldırmaq mümkün olmasa, monitor yenisi ilə əvəzlənir”.
Ləman Abbaslı
