Qubanın dağ yəhudilərinin kompakt yaşadığı Qırmızı Qəsəbədə dağ yəhudilərin milli "Pesax bayramı" qeyd edilməyə başlayıb.
Ednews xəbər verir ki, tədbirdə Quba Rayon İcra Hakimiyyətinin başçısı Ziyəddin Əliyev, hüquq-muhafizə orqanlarının rəhbərləri, millət vəkili, həkim Anatoli Rafailov, "Azərbaycan Dağ Yəhudiləri Dini İcması"nın sədri Mixil Yevdayev, yerli sakinlər, ictimaiyyət nümayəndələri iştirak ediblər.
Tədbir iştirakçıları ilk öncə, Qırmızı Qəsəbədə Ulu öndər Heydər Əliyevin adını daşıyan "Mədəniyyət və istirahət parkı"nda Ulu öndərin abidəsini ziyarət ediblər, abidə önünə tər güllər düzülüb.
Quba Rayon İcra Hakimiyyətinin Başçısı Ziyəddin Əliyev çıxışında bildirib ki tolerant Azərbaycanın çoxmillətli Quba rayonunda 60 məscidlə yanaşı, yəhudilərə məxsus 2 sineqoq və dini icma da fəaliyyət göstərir.
"Dağ yəhudiləri də Qubada yaşayan digər milli azlıqlar kimi mehriban qardaşlıq şəraitində həyat sürürlər. Rayon rəhbəri Birinci-ci və İkinci Qarabağ və müharibələrində yəhudi gənclərin də Azərbaycanın ərazi müdafiəsinə qalxdıqlarını bildirib və buna nümunə kimi Azərbaycanın Milli Qəhrəmanı, tankçı Albert Aqarunovun adını hörmətlə çəkib".
"Azərbaycan Dağ Yəhudiləri Dini İcması"nın sədri Mixil Yevdayev Bakıdan özü ilə tədbirə dəvət etdiyi yəhudi hərbçini də tədbir iştirakçılarına təqdim edərək, milliyyətcə yəhudi olan David Sadiyevin "Vətən Müharibəsi"ndə könüllü iştirak etdiyini diqqətə çatdırıb. Yəhudi əsilli millət vəkili, həkim Anatoli Rafailov Azərbaycanın tolerant ölkə kimi dünyada tanınmasından və bu sahədə uğur qazanmasından söz açıb.
Qeyd edək ki, Anatoli Rafailov Birinci Qarabağ müharibəsində həkim kimi iştirak edərək, bir çox döyüşçünün həyatını xilas edib.
Sonda, iştirakçılar Heydər Əliyev adına "Mədəniyyət və istirahət parkı"nda dağ yəhudilərinin tarixinə, mədəniyyətinə, adət-ənənələrinə həsr edilmiş sərgi ilə tanış olublar.
Xatırladaq ki, 3000 ildən çox olan bu bayram həm də bir çox əfsanəvi söhbətləri özündə əks etdirir. Yusif peyğəmbərin dövründə və ondan sonrakı illərdə Misirdə yaşayan yəhudilər təşəkkül mərhələsində idi. Yusif peyğəmbərin ölümündən sonra Misirdə dəyişən firon və hakimiyyət yəhudilərin artdığını görüb, onları gözümçıxdıya salmağa başlayır. Onları qul kimi tikintidə, digər ağır işlərdə işlətməyə başlayırlar. Bundan bezen yəhudilər firona müraciət edərək, Misiri tərk etmək üçün möhlət istəyirlər. Firon razılaşır. Onlardan qısa zamanda Misiri tərk etmək tələbi qoyur. Hətta, qadınların yoğurduğu xəmirin belə turşumasını belə gözləmədən yolda yeməyə götürürlər, hazırda bayramda bişirilən qoğal simvolik olaraq, həmin xəmirdən hazırlanan yeməyi bildirir. Musa peyğəmbərin başçılığı altında böyük dəstə yola düşür. Sonradan verdiyi bu qərardan peşman olan firon, onları təqib etməyi tapşırır. Uzun yol gələn dəstə, dənizin kənarına gəlib çatmışdılar. Artıq irəli yol yox, arxadan isə fironun qoşunu çatmaq üzrə idi. Musa peyğəmbərin kənara çəkilib, qövmünün xilası üçün Allaha dua edərək, möcüzə yaratmağı istəyir. Allah Musa peyğəmbərin səsini eşidir. Ona dua edib, əsasını dənizə vurmağı tapşırır. O, belə də edir. Dəniz iki yerə ayrılır, quru yolu açılır. Dəstə keçməyə başlayır. Onlar keçdikdən sonra sular birləşməyə başlayır. Onları təqib edən fironun qoşunu suda məhv olur və yəhudilər xilas olur. Onlar indiki Sinay yarımadasında məskunlaşırlar. Ona görə də yəhudilər indi qeyd etdikləri bayramda həmin acılı günlərdə başlarına gələnləri xatırlayır, gələcək nəsillərə ötürürlər.
Qeyd edək ki, yəhudilərin "Pesax bayramı" aprelin 15-dən başlayaraq aprelin 23-dək 8 gün davam edəcək.
Aydın Adıgözəlov. Quba
