Bu gün Azərbaycanın Milli Qəhrəmanı Allahverdi Bağırovun dünyaya gəlməsindən 76 il ötür.
Milli Qəhrəmanın doğum günündə onunla döyüşlərdə çiyin-çiyinə vuruşan, şəhid atası Əkbər Rüstəmov Ednews-a onunla bağlı xatirələrini danışıb.
“Allahverdi Bağırovu hələ lap gənclik illərindən tanıyırdım. Hər ikimiz idmançı idik. Yüngül atletika, voleybol ilə məşğul olurduq. Qarabağ hadisələri başlayanda birgə məsləhətləşib 1992-ci il martın 21-də batalyon yaratdıq. 845 nömrəli batalyon onun qardaşının adını daşıyırdı. Eldar Bağırovun həmin dövrdə böyük xidmətləri var idi. O, Allahverdidən öncə 1991-ci ilin oktyabr ayında qətlə yetirilib. Allahverdi Bağırovun oğlu Elşən bizim batalyonda döyüşürdü, rabitə komandasının rəisi idi. Bacısı uşaqları da bizlə bir yerdə döyüşürdü”.
Daha əvvəl rota komandiri, sonra Allahverdi Bağırovun müavini olan Əkbər Rüstəmov Milli Qəhrəmanın ən böyük hərbi uğuru olan Aranzəmin döyüşündən də söz açıb.
“Biz 2 saat 40 dəqiqə gedən döyüşlər nəticəsində beş kəndi - Aranzəmin, Naxçıvanlı, Pircamal, Dəhrəz kəndləri azad etdik. Onunla Xoramurtun alınmasında zamanı düşmən mövqelərinin bir-birinə birləşməsinə imkan vermədik. Allahverdi Bağırovun Xocalıdan olan əsirlərin dəyişməsi prosesində həddən artıq böyük köməyi olub. Müharibə zamanı düşmən ilə danışıb, haqqını tələb etmək çətin bir şeydir. Allah ona rəhmət eləsin, qəbri nurla dolsun”.
Döyüş yoldaşı Milli Qəhrəman Allahverdi Bağırova 3 kitab həsr etdiyini də bildirib.
““Qalx ayağa vətən oğlu”, “Qapımı vətən döydü”, “Vətən kitabı”nda onunla bağlı xatirələrimi qələmə almışam. Allahverdi xaraktercə möhkəm və eyni zamanda mülayim insan idi. Dosta, vətənə, millətə qarşı həmişə sədaqətli olub. Nə qədər həyatda varamsa o hər zaman mənim qəlbimdədir”.
Xatırladaq ki, Bakının Qaradağ rayonundakı “Qobu Park-3” yaşayış kompleksində müvəqqəti məskunlaşmış Ağdamdan məcburi köçkün, Birinci Qarabağ müharibəsi veteranı, şəhid atası Hacı Əkbər Rüstəmov Birinci Qarabağ savaşında 3 oğlu ilə birgə iştirak edib və onlardan birini – on doqquz yaşlı Sənanı itirib. Güləş üzrə Əməkdar idman ustası olan Əkbər müəllim məcburi köçkünlük dövründə uzun müddət pedaqoji fəaliyyətlə məşğul olub, eyni zamanda, müharibə veteranı kimi gənclər arasında tərbiyəvi iş aparıb.
Qeyd edək ki, Allahverdi Bağırov 1946-cı il aprel 22-də Ağdamda anadan olub. Onun 1988-ci ildə erməni təcavüzü başlayarkən Ağdamda ilk özünümüdafiə dəstələrinin formalaşmasında böyük rolu olub. Aranzəmin kəndi uğrunda döyüşlərdə A. Bağırovun dəstəsi 100 nəfər erməni əsgərini məhv edib və 10 düşmən əsgərini əsir götürüb.
Gülnar Səlimova
.jpg)
.jpg)
