“Wolt” yemək sifarişi xidmətinin kuryerləri şirkəti baykot edib. Buna səbəb isə aldıqları məvacibin az olmasıdır.
Ednews xəbər verir ki, bu barədə dünəndən etibarən sosial şəbəkələrdə çağırışlar səsləndirilir.
Artıq iki gündür işə çıxmayan kuryerlər şirkətin mobil proqramını dondurublar. İnsanlara statistika kimi yox, insan kimi yanaşsınlar deyən kuryerlər səslərinin şirkətə çatdıracaqlarına inanırlar.
Kuryerlərin sözlərinə görə, onlar dəfələrlə şirkət sahibindən maaş artımı tələb ediblər. Çünki, onlar düşünürlər ki, gördükləri iş müqabilində aldıqları məvacib qat-qat aşağıdır. Lakin hər dəfə bu tələblə çıxış etdikləri zaman kuryerlərə rəhbərlik tərəfindən “iş üçün növbə gözləyən onlarla insan var” deyə qeyd edilib.
Buna baxmayaraq kuryerlər birlikdə olaraq yaratdıqları gücdən əmindirlər. Onlar inanırlar ki, atdıqları addım sayəsində istədikləri tələblərinə nail olacaqlar.
Baykot edən şirkət əməkdaşları bütün media nümayəndələrini, kuryer həmkarlarını və onlara dəstək olmaq istəyən insanları aksiyaya qoşulmağa dəvət ediblər.
Məsələ ilə bağlı “Wolt” şirkəti ilə əlaqə yaratmağa çalışsaq da, çox təəssüf olsun ki, bütün cəhdlərimiz boşa çıxdı.
Qeyd edək ki, “Wolt”un əsası 2014-cü ildə Helsinki şəhərində qoyulub və bu gün şirkət 450 işçisi ilə 16 ölkədə faəliyyət göstərir. Şirkət 54 şəhərdə 5000-dən çox restoran və 10000-dən çox kuryer partnyor ilə əməkdaşlıq edir.
Xatırladaq ki, yemək sifarişi xidməti olan “Wolt” öz 16-cı ölkəsi olan Azərbaycanda 2019-cu il 19 iyulda rəsmən fəaliyyətə başlayıb.
Ləman Abbaslı
