Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Beynəlxalq Avrasiya Mətbuat Fondu tərəfindən həyata keçirilən ““Minasız Azərbaycan, Təhlükəsiz Qarabağ” beynəlxalq konfransına hazırlıq” layihəsi çərçivəsində tədbir keçirilib.
Ednews xəbər verir ki, tədbirdə açılış nitqi ilə çıxış edən Beynəlxalq Avrasiya Mətbuat Fondunun prezidenti Umud Mirzəyev əvvəlcə Azərbaycanın mina probleminin aktuallığından söz açıb. O, qeyd edib ki, Azərbaycan mina və müharibənin partlayıcı qalıqlarından ən çox əziyyət çəkən ölkələr sırasındadır.
“Bu gün işğaldan azad edilmiş ərazilərin bərpası və məcburi köçkünlərin geri qayıdışı Azərbaycanın əsas prioritetlərindəndir. Həmin ərazilərin dağıdılması, viran və talan edilməsi, yandırılması, ekoloji terrora məruz qalmasıyla yanaşı, ərazilər başdan-başa minalanıb və qadağan olunmuş hərbi sursatlarla çirkləndirilib. Müharibə bitsə də gözəgörünməz düşmənlə mübarizə davam etməkdədir. Vətəndaş cəmiyyəti qurumu olaraq BAMF 2000-ci ildən BMT-in İnkişaf Proqramının dəstəyi ilə Azərbaycanda həyata keçirilən Mina Təhlükəsizliyi ilə mübarizə proqramına qoşulub”.
Daha sonra çıxış edən Azərbaycan QMƏVŞAİB-in sədri e.o.polkovnik Mehdi Mehdiyev bildirib ki, hər bir mina bir insan həyatıdır. Qeyd edək ki, Azərbaycanda ən böyük veteran təşkilatlarından birinin rəhbəri olan Mehdi Mehdiyev özü minadan zərərçəkən şəxslərdəndir və hazırda mina təmizləyən olaraq çalışır. O, bu gün Qarabağda mülki infrastrukrur, əkin sahələri və hərbi obyektlərdə aparılan mina təmizləmə işləri barədə məlumat verib. Onun sözlərinə görə daha təhlükəli sahələr arx içi, dağ yamacları, su hovzələridir. Bu ərazilər bir müddət sonra torpaqla örtülür, həmçinin bəzi yerlərdə torpaq yumşaldığı üçün mina daha dərinə gedir və təmizlənməsi illər aparır.
Azərbaycan Yazıçılar Birliyinin üzvü, sosioloq Əhməd Qəşəmoğlu bu cür maarifləndirmə tədbirlərinin əhəmiyyətini vurğulayıb. Bildirib ki, bu prosesdə hər kəs iştirak etməlidir. O, beynəlxalq ictimai qınağın yaradılması üçün təkliflə çıxış edib.
Milli QHT Forumunun rəhbəri Rauf Zeyni Beynəlxalq Avrasiya Mətbuat Fondunun vətəndaş cəmiyyəti təşkilatı olaraq mina təhlükəsizliyi sahəsindəki fəaliyyətini yüksək qiymətləndirib. O, həmçinin QHT Agentliyi tərəfindən göstərilən dəstəyin əhəmiyyətini vurğulayıb.
Minalar Əleyhinə Azərbaycan Kampaniyası İctimai Birliyinin (İB) sədri Hafiz Səfixanovun sözlərinə görə minalar əvəzolunmaz silahdir. O, hərbi məqsədə xidmət edən minaların mülki əhaliyə qarşı istifadəsinin beynəlxalq konvensiyalara zidd olduğunu xüsusi vurğulayıb.
Mətbuat Şurasının sədri Əflatun Amaşov bildirib ki, Beynəlxalq Avrasiya Mətbuat Fondunun fəaliyyətinin bir hissəsi də mina təhlükəsizliyinə həsr olunub.
“Harada müharibə olubsa, orada mina var. Məsələn, Əfqanıstanda, Pakistanda, Afrikanın şimal ölkələrində olduğu kimi. Mina təmizləmə sahəsində təcrübənin əldə olunmasına, insanlar arasında maarifləndirmə sahəsində ciddi işlərin aparılmasına ehtiyac var. Rusiya-Ukrayna müharibəsi göstərdi ki, hər zaman gözlənilməz hadisələr baş verə bilər. Doğrudur, Azərbaycanla Ermənistan arasında sülh istiqamətində danışıqlar gedir, amma Ermənistandan mina xəritələrinin alınması tezləşdirilməlidir”.
İTD İB-nin rəhbəri Cəsarət Hüseynzadə minatəmizləmə kampaniyasında vətəndaş cəmiyyətinin fəal rol oynadığını deyib. O, maarifləndirmə çarxlarının hazırlanib televiziya efirlərində nümayiş etdirilməsinin vacibliyini vurğulayıb.
"Zərif" qadın ədəbi məclisinin sədri, şairə Xatirə Fərəcli bu məsələdə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyini yüksək qiymətləndirib. Mina qurbanlarına həsr olunan bədii filmin çəkilməsi təklifi ilə çıxış edib.
Qeyd edək ki, layihənin əsas məqsədi mina təhlükəsi ilə mübarizədə aktiv fəaliyyət göstərən ölkələrin, beynəlxalq təşkilatların diqqətini Azərbaycanın mina probleminə yönəltmək, ölkəmizin qarşılaşdığı bu bəlanın qısa zamanda həllinə dəstək verməkdir.
Tədbirdə layihə çərçivəsində BAMF tərəfindən hazırlanan Azərbaycanın mina problemi ilə bağlı iki dildə çap olunan qısa broşur və layihənin yekun hesabat bülletini təqdim olunub.
Tədbirdə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin əməkdaşları, tanınmış vətəndaş cəmiyyəti və media qurumlarının nümayəndələri iştirak edib. Tədbir iştirakçıları BAMF-ın həyata keçirdiyi layihənin əhəmiyyətini və icrasını yüksək qiymətləndiriblər.
