Son günlər digər meyvələrdən ucuz olan banan supermarketlərdə daha baha qiymətə satılır. Hazırda iri supermarket şəbəkələrində bananın 1 kiloqramını 2,78-2,89 manata təklif edirlər.
Yol kənarlarında, məhəllələrdə yerləşən meyvə-tərəvəz dükanlarında isə bananın kiloqramı 2 manata satılır. Bazarlarda isə qiymət bir qədər də aşağıdır.
Bəzilərinin fikrincə, supermarket rəhbərləri əsas qida və qeyri-qida məhsulları üçün alış-veriş edən əksər alıcıların bir banan üçün daha ucuz satılan yerlərə getməyəcəyini bildiyindən qiymət artımına yol verirlər.
Məsələ ilə bağlı Azad İstehlakçılar Birliyinin (AİB) sədri Eyyub Hüseynov Ednews-a açıqlaması zamanı bildirib ki, Azərbaycanda banan qonşu ölkələrdən daha baha satılır.
“Bizdə bananın qiyməti həddindən artıq yüksəkdir. Məsələn, “Meyvəli” bazarında bananın qiyməti digər yerlərdə satılandan daha bahadır. Marketlər keyfiyyət siyasətində istehlakçılarla istədikləri kimi davranırlar. Hətta marketə gedən istehlakçıya potensial oğru kimi baxıb onun ciblərini, çantasını belə yoxlayırlar. Bu barədə dəfələrlə dövlət orqanları qarşısında məsələ qaldırmışıq. Cavabda isə «marketlərin öz ərazisidir, istehlakçılarla istədikləri kimi davrana bilərlər. Düşünürəm ki, bu cür neqativ halların aradan qaldırılması üçün Nazilər Kabineti marketlər və restoranlar üçün qaydalar hazırlamalı və bu qaydalara bütün ticarət obyektləri əməl etməlidirlər”.
E. Hüseynovun sözlərinə görə, bir çox ölkələrdə - qonşu Rusiyada, Ukraynada marketlərdə istehlakçı guşəsi var.
“Bu guşədə qanunlar yazılır, həmçinin marketlərdə müəyyən şikayət dəftərləri var və s. Lakin bizdə bu yoxdur. Azad İstehlakçılar Birliyi illər əvvəl bu barədə bir layihə çərçivəsində şikayət və təkliflər dəftərini hazırladı. Biz Antiinhisar və İstehlak Bazarına Nəzarət Dövlət Xidmətinə təklif etdik ki, bunu bütün marketlərdə yayılması üçün köməklik etsinlər. Lakin çox təssüflər olsun ki, bu layihə olaraq qaldı, onun yayılması üçün heç bir tədbir görülmədi. Market sahibləri də bundan istifadə edərək istehlakçı hüquqlarının pozmaqla məşğul olurlar. Lakin o, üzünü istehlakçıya doğru çevirməlidir. Çünki biznesi saxlayan biz istehlakçılarıq”.
O əlavə edib ki, qanunlardakı zəiflik, Antiinhisar və İstehlak Bazarına Nəzarət Dövlət Xidmətinin bu sahəyə heç bir diqqət yetirməməsi, istehlakçı hüquqlarını qoruma alqoritminin həddindən artıq bərbad bir vəziyyətdə olması, sonda marketlərin istənilən qiymətdə istehlakçılara mal təklif etmələrinə gətirib çıxarır.
“Bu anormal haldır. AİB bu hal ilə razılaşa bilməz və biz buna etiraz səsimizi qaldırırıq. O cümlədən, banan ticarətində də bu problem yaşanır, belə ki, bu meyvə maya dəyərindən qat-qat baha satılır. Düşünürəm ki, bu məsələ həll olunmalıdır”.
Qeyd edək ki, hazırda Azərbaycana banan ən çox Misirdən idxal olunur. Misirdə isə bananın bir kiloqramı 0.20 AZN dəyərində satılır.