Son zamanlar əsasən Bakıətrafı qəsəbə və kəndlərinə olan avtobusların normal çalışmaması barədə şikayətlər artmaqda davam edir. Belə ki, bu marşrut xətlərindən istifadfə edən sərnişinlər iddia edirlər ki, axşam evə qayıdanda onlar saatlarla marşrut gözləməyə məcbur olurlar. Çünki saat 22.00-dan sonra Bakıətrafı qəsəbə və kəndlərə avtobus tapmaq mümkün olmur.
Məsələ ilə bağlı Ednews-a danışan Nəqliyyat məsələləri üzrə ekspert Elməddin Muradlı problemin qaynağını və həlli yolunu açıqlayıb. O, belə problemlərin ən çox özəl şirkətlərə məxsus avtobuslarda müşahidə edildiyini vurğulayıb:
“Avtobusların fəaliyyəti ilə bağlı narazılıqların əsaslı səbəbəri var. Qaydalara görə ictimai nəqliyyat gecə saat 12-yə qədər işləməlidir. Özəl şirkətlər bəzən bu qaydanı görməzdən gəlirlər. Şəhərdəki avtobusların əksəriyyəti də özəl şirkətlərə məxsusdur. Onlar da axşam saatlarında işləməyi artıq xərc hesab edirlər”.
Ekspert bunu yanacağın qiymətinin bahalaşması ilə əlaqələndirib. Daşıyıcı şirkətlər isə qiymətlərin qaldırılmasında maraqlıdırlar...
“Daşıyıcı şirkətlər bir sərnişinin daşınmasının 82 qəpiyə başa gəldiyini açıqlayıblar. Lakin ölkədə sərnişin daşınması şəhərdaxili 30 qəpiyə, Bakıətrafı isə 40-50 qəpikdir. Pik saatlarda avtobusu doldurub rahat sürürlər. Axşam isə 3-5 nəfər minir deyə əlverişli hesab etmirlər. Bu vəziyyət həm sərnişinləri, həm də daşıyıcı şirkəti narazı salır. Daşıyıcı şirkətlərin gediş haqqının qaldırılması tələbinin havada qalması da onların etirazına səbəb olur”.
Sonda ekspert qeyd edib ki, dövlət hər iki tərəfi razı salmaq üçün tənzimləmə planı hazırlamalıdır ki, bu kimi problemlərin yaşanmaması üçün xüsusi nəzarət mexanizmi həyata keçirilsin.
Məsələnin rəsmi tərəfini öyrənmək üçün Bakı Nəqliyyat Agentliyinə müraciət etdik. Qurumun Mətbuat xidmətinin rəhbəri Mais Ağayev bildirib ki, müntəzəm marşrut xətləri üzrə avtobusların iş qrafiki, intervallar və avtobus sayı sərnişin tələbatına uyğun olaraq tənzimlənir:
“Hər hansı ətraf kənd və qəsəbə istiqamətində fəaliyyət göstərən marşrut xətti üzrə avtobuslar axşam pik saatları da daxil olmaqla, normalda 5-10 dəqiqə intervalla hərəkət edirsə, axşam pik saatlardan sonra artıq həm intervalların müddəti artır, həm də avtobusların sayında müəyyən azalmalar olur. Çünki həmin saatlarda sərnişin tələbatı elə də yüksək deyil”.
Mətbuat katibi həmçinin qeyd edib ki, həqiqətəndə bəzən sürücüləri axşam pik saatlardan sonra vəziyyətdən sui-istifadə edərək avtobusları daha tez vaxtda xətdən geri çəkmələri müşahidə edilir.
“Bu da sərnişinlərimizin narahatlığına səbəb olur. Tərəfimizdən belə hallar aşkar olunduqda bu zaman zəruri tədbirlər görülür”.
Xanlar Əlibəy