Azərbaycanın regionlarına səfərə gedən məktəblilərin qəza xəbərləri ilə son bir ayda gündəmi zəbt edib. Artıq bu müddət ərzində 3-cü dəfədir ki, səyahətə gedən məktəbliləri daşıyan avtobus rayon yollarında qəzaya uğrayır.
Bu da belə səyahətlərin təşkilatçılığı və təhlükəsizlik qaydalarına riayət olunması məsələsin müzakirə mövzusuna çevirib.
Kimdir günahkar?..
Ötən gün axşam Bakı–Şamaxı yolunda qəzaya uğrayan avtobusa görə isə müəllimlər,təşkilatçılar və məktəb direktoru günahlandırıldı.
Ekspertlərin fikrincə, əgər qəza məktəb vaxtında baş verməyibsə, buna görə, təhsil müəssisəsi cavabdehlik daşıya bilməz. Onların sözlərinə görə, burada birbaşa günahkar təşkilatçılardır. Bu cür səyahətlərin təhlükəsizliyi əvvəlcədən planlanmalı və təmin olunmalıdır. Çünki belə səfərlər zamanı məktəblilərin təhlükəsizlik məsələsi çox böyük önəm daşıyır.
Təhlükəsizlik qaydaları...
Təhlükəsizlik üzrə ekspert Rəşad Rza Təhsil Nazirliyini belə turlara nəzarət mexanizmini cəlb etməyə səsləyib. O, bu təklifi Ednews-a açıqlaması deyib.
“Hər qurumun öz təhlükəsizlik qaydaları var, o da qaydalara uyğun tənzimlənməlidir. Məsuliyyət də iki tərəfinin üzərinə düşür. Amma əlbəttə ki, ən çox məsuliyyət məktəbin üzərinə düşür. Çünki ad məktəbin adıdır. Təhlükəsizlik məsələsi elə bir məsələdir ki, burada bir ya da iki tərəfli danışmaq olmaz. Hətta onu da deyim ki, belə turlara naziliyin tərkibində ictimai nəzarət yaradılıb. Onlar buna nəzarəti həyata keçirməlidir. Əgər Təhsil Nazirliyindən məktəblilərin turları ilə bağlı müəyyən addımlar atılsa, onda belə hadisələr say etibarı ilə azalar və təhlükəsizliyə daha ciddi nəzarət edilə bilər”.
Təhsil Nazirliyi yanında İctimai şuranın üzvü İlqar Orucov isə deyir ki, səfəri təşkil edənlər turizm şirkəti ilə bağlı hər tərəfli məlumatlı olmalı idi. Belə olan halda bu kimi bədbəxt hadisələr olmaz.
“Nəzərə alsaq ki, məktəblərin bağlanmasına bir neçə gün qalıb belə səfərlərin sayı çox olacaq. Burada təkcə nəqliyyat hadisəsi yox, tur zamanı yeməkdən zəhərlənmə, zəhərli həşəratların sancması da ola bilər. Mən əminəm ki, bu səfəri təşkil edənlər o sürücünün peşəkarlılığından xəbərsizdirlər, heç maraqlanmayıblar. Təkcə sürücü yox, turizm şirkəti ilə bağlı məlumatsızdırlar. Burada başqa faciəvi bədbaxt hadisə də ola bilərdi. Valideynlərin belə zamanda müəllimlərlə başı qarışması da səbəb olur”.
İlqar Orucov onu da qeyd etdi ki, belə turların təşkili zamanı tənzimlənməsi ilə bağlı qaydalar yoxdur, ancaq buna ehtiyyac var.
“Məktəb yalnız daxili ekskursiyalara cavabdehlik daşıyır, məsələn Nəbata bağı, Tarix muzeyi kimi yerlərə. Amma təbiət qoynunda istirahət üçün gedənlərin təhlükəsizliyi bu qaydalarla tənzimlənmir. Düşünürəm ki, bu məsələyə doğru yanaşmısız, belə turları da tənzimləyəcək qaydaların hazırlanmasına ehtiyyac var. Belə olduğu halda nizam da olar, təhlükəsizlik də.
Bəs Təhsil Nazirliyi nə deyir?
Bakı Şəhəri üzrə Təhsil İdarəsinin İctimaiyyətlə əlaqələr sektorunun müdiri Bəşarət Məmmədovun sözlərinə görə, dərsdənkənar vaxtda direktorun məsələyə heç bir müdaxiləsindən söz gedə bilməz.
“İstirahət günü, eyni zamanda dərsdənkənar vaxtda valideyn təşəbbüsü ilə səfər planlamasına direktorun müdaxilə imkanı yoxdur. Bir daha valideynlərə çağırış edirik ki, dərsdənkənar vaxtlarda və tətil müddətində bu kimi səfərlərə təşəbbüs göstərərkən müvafiq normalara cavab verən qurumlarla qanunauyğun şəkildə tərəfdaşlıq etsinlər”.
Ləman Abbaslı