Bir müddət əvvəl məktəblərdə “İnsan və cəmiyyət” fənninin tədris proqramından çıxarılması ilə bağlı məsələni qaldırmışdıq.
Ekspertlər cəmiyyətdə neqativ hallara daha çox rast gəlinən bu günlərdə sosial yönümlü fənnlərin tədrisinin vacib olduğunu bildiriblər. Bundan əlavə təklif edirlər ki, məktəb dərsliyin ə “Psixologiya”, “Etika və estetika, davranış qaydaları” və s. kimi fənnlər daxil edilsin.
Məsələ ilə bağlı Ednews-un Təhsil Nazirliyinə ünvanladığı sorğuya cavab olaraq bildirilib ki, Nazirlər Kabinetinin 03 iyun 2010-cu il tarixli 103 nömrəli qərarı ilə təsdiq edilmiş “Azərbaycan Respublikasında ümumi təhsilin dövlət standartları”nda və həmin qərara dəyişiklik edilərək Azərbaycan Respublikası Nazirlər Kabinetinin 29 sentyabr 2020-ci il tarixli 361 nömrəli qərarı ilə təsdiq edilmiş “Azərbaycan Respublikasında ümumi təhsilin dövlət standartları” sənədində ümumi təhsilin səviyyələrində tədris edilməli fənlər sırasında “İnsan və cəmiyyət” fənni yer almır.
Nazirlikdən verən açıqlamada qeyd edilib ki, əvvəllər tədris olunan “İnsan və cəmiyyət” fənninin tərkib hissəsi bir neçə fənnin “Həyat bilgisi”, “Azərbaycan tarixi”, “Ümumi tarix” fənlərinin əsas və alt məzmun xətlərinə daxil edilib.
“Həyat bilgisi fənni üzrə təhsil proqramının (1. Təbiət və biz 2. Fərd və cəmiyyət 3. Mənəviyyat 4. Sağlamlıq və təhlükəsizlik), “Azərbaycan tarixi” və “Ümumi tarix” fənləri üzrə təhsil proqramlarının 4 əsas məzmun xətti (1.Tarixi zaman 2. Tarixi məkan 3. Dövlət 4. Şəxsiyyət 5. Mədəniyyət) “İnsan və cəmiyyət” fənninin birbaşa və ya dolayı tərkib hissəsidir.
Sözügedən sənəddə həmçinin “Psixologiya” fənni də nəzərdə tutulmur. Bununla belə qeyd etməliyik ki, fənlərin və dərsdənkənar məşğələlərin yalnız məzmunu deyil, həm də onların keçirilmə forması, eləcə də məktəbdə formalaşdırılan mühit təhsilalanların özünü və başqalarını anlayan insan, cəmiyyətin fəal üzvü kimi yetişdirilməsinə xidmət edir”.
Nazirliyin verdiyi açıqlamaya münasibət bildirən təhsil eksperti Elçin Əfəndinin sözlərinə görə, “Həyat bilgisi” və ya “Tarix” dərsliklərində insan və cəmiyyətlə bağlı əvvəlki proqramları nəzərə alsaq, müəyyən informasiyalar yer alsa da, onu tam əhatə etmir:
“Əsas dərslik kimi götürülürsə də bu yalnız ibtidai təhsil pilləsini əhatə edir. Yuxarı təhsil pilləsində bu dərslər tədris olunmur. Xatırladım ki, “İnsan və cəmiyyət” fənni əsasən 9-11-ci siniflərdə keçirilirdi”, - deyə ekspert vurğulayıb.
Gülnar Səlimova
.jpeg)