Türkiyə istədiyi vaxt Suriyanın şimalında yeni sərhəd əməliyyatına başlayacaq.
Ednews TASS-a istinadən xəbər verir ki, bu barədə bazar günü ölkənin Müdafiə Nazirliyinin rəhbəri Hulusi Akar danışıb.
“Prezidentimiz Rəcəb Tayyib Ərdoğan əməliyyatın bir gecə gözlənilmədən başlayacağını söylədi. Doğrudan da, bu, taktiki və strateji məsələdir və bununla bağlı lazımi məsləhətləşmələr aparılır. Qanuni hüquq və mənafelərimizin müdafiəsi zərurətindən çıxış edərək, lazımi planlar hazırlanıb və müvafiq işlər həyata keçirilib”, - deyə nazir “Haber Global” telekanalına müsahibəsində bildirib.
O, qeyd edib ki, NATO-nun iyunun 28-30-da keçirilən sammitində Türkiyənin alyansdakı müttəfiqlərindən heç biri onu Suriyadakı əməliyyatın ləğvi və ya təxirə salınmasının zəruriliyinə inandırmağa çalışmayıb.
Akar əlavə edib ki, ikitərəfli danışıqlarda belə bir şey olmayıb. O, Ərdoğanın mövqeyini xatırladıb və deyib ki, Ankara sərhədyanı əməliyyatlar məsələsində heç kimlə məsləhətləşmək niyyətində deyil.
Türkiyə hakimiyyəti daha əvvəl respublikanın Silahlı Qüvvələrinin Suriyanın şimalında yeni əməliyyata tam hazır olduğunu bildirmişdi. Ankara 2019-cu ilin oktyabrında “Sülh mənbəyi” əməliyyatından sonra yaradılmış 30 kilometrlik təhlükəsizlik zonasının genişləndirilməsini planlaşdırıb.