I Qarabağ savaşında Vətən uğrunda həlak olan Füzuli şəhidlərinin anım günü keçirilib - FOTOLAR - ednews.net

27 Sentyabr, Çərşənbə axşamı

(+994 50) 229-39-11

I Qarabağ savaşında Vətən uğrunda həlak olan Füzuli şəhidlərinin anım günü keçirilib - FOTOLAR

Cəmiyyət A- A A+
I Qarabağ savaşında Azərbaycanın ən dilbər guşələrindən biri olan Füzuli rayonu uğrunda gedən döyüşlərdə şəhid olan qəhrəmanların  həlak olmasından 30 il ötür. Hadisənin 30 illiyi ilə bağlı böyük tədbir keçirilib.
 
1992-ci il 15 avqustda Füzuli rayonunun şimal və cənub istiqamətləri olmaqla iki taborun hərbçiləri döyüş əməliyyatlarını uğurla yerinə yetirərkən qəhrəmancasına şəhid olublar.
 
Şəhid hərbçilərimizə həsr olunan tədbirdə dövlətimizin istiqlaliyyəti və ərazi bütövlüyü uğrunda canlarından keçən qəhrəman döyüşçülərin xatirəsi bir dəqiqəlik sükutla yad edilib. 
 
 
Anım mərasimində çıxış edən millət vəkili Aqil Abbas tədbirin əhəmiyyətindən söz açıb. Deputat o dövrdə Füzuli əhalisinin qəhrəmanlığından danışaraq onların düşmənə qarşı əliyalın döyüşdüyünü deyib.
 
“Biz erməni ilə döyüşmürdük. Erməni ilə döyüşəndə biz Mardakerti azad etdik, Yeddi Xırmana çıxdıq.  Cəbrayılın polis rəisi Rəşid Məmmədov 13 erməni kəndini boşaltmışdı. Ağdamda 17 yaşlı lənkəranlı uşaq evdən qaçıb gəlmişdi, qoşalülə ilə vuruşurdu. O şəhid olanda atası oğlunun Lənkəranda deyil, şəhid olduğu yerdə dəfn olunmasında israr etdi. Sonra onun atası da döyüşlərdə vuruşdu və o da qəhrəman oğlu kimi şəhid oldu. İnsanlar bu ürəklə savaşırdı”. 
 
O, çıxışı zamanı İkinci Qarabağ savaşında ən çox məhz Füzuli əhalisindən şəhid olduğu barədə də söz açıb.
 
 
“Müharibə başlayan gün cəbhə bölgəsinə getmişdim, Füzuli, Ağcabədi, Tərtərdə oldum, Füzulidə xəstəxanada yaralılarla görüşdüm. Azərbaycanın hər bölgəsinin insanı müharibədə vuruşub və şəhid verib. Allahdan şəhidlərimizə rəhmət, qazilərimizə can sağlığı diləyirəm. Şükür Allaha ki, bayrağımız Şuşada dalğalanır və inşallah tezliklə Xocalıda, Əsgəranda və digər bölgələrimizdə dalğalanacaq”. 
 
Xatirə gecəsində çıxış edən Beynəlxalq Avrasiya Mətbuat Fondunun prezidenti Umud Mirzəyev 1992-ci ilin o ağır günlərinin şahidlərindən biri olduğunu deyib.
 
“O zaman Quruçay cəmiyyətinin formalaşdığı dövr idi. 15 avqust hadisəsindən dərhal sonra Əlabbas Bağırov, Almaz Ülvi və mən olmaqla Azərbaycanın ona yaxın ziyalısı əraziyə hərəkət etdik. Füzulidə həmin vaxt vəziyyət çox ağır idi. Qaradağlı-Hadrut, Veysəlli-Xocavənd istiqamətlərində hər gün hücumlar edilirdi. Ölkə əhalisi və rəhbərliyi bütün bu baş verənlərə inanmırdı. Düşünürdük ki, Moskvadan kimsə gəlib bu problemi həll edəcək. Təəssüf ki, bu belə olmadı”.
 
Belə tədbirlərin mütəmadi keçirilməsinin vacibliyinə diqqət çəkən U. Mirzəyev 15 avqust faciəsində həlak olanların qəhrəmanlıqlarını cəmiyyətimizə daha çox çatdırmalı olduğunu vurğulayıb.
 
“Bu günə görə hər birimiz onlara borcluyuq. Hörmətli millət vəkili Aqil Abbas çox gözəl qeyd etdi ki, şəhidlərimiz və onların anaları bir-birinə bənzəyir. Tədbirdən öncə 1992-ci il 15 avqust hadisələrinə şahidlik edən qardaşlarımızla söhbətimiz oldu. Burada iştirak edən, 30 illik mübarizəmizdə rolu olan hər kəs o zaman şəhid ola bilərdi. Bu zəfərimiz olmasaydı biz də indi ayaq üstə gəzən bir şəhid idik.
 
O qanlı-qadalı günlərdə xarici jurnalistlərlə bəlkə yüz dəfə qarlı meşələrdə gəzdiyimiz kadrlar müxtəlif ölkələrdə yayımlanıb. İkinci Qarabağ savaşında iki ay ərzində Əl-Cəzirə telekanalı ilə birgə çəkilişlərdə olduq”.
 
O, həmçinin şəhid ailələrinə dəstək olan təşkilatlara və bugünkü tədbirin təşkilatçılarına minnətdarlığını da bildirib.
 
“Mən şəhid anaları qarşısında baş əyirəm, şəhadətimiz mübarək. Biz 30 ildə bu ağrı-acını daşıdıq, aramızda elə insanlar var ki, ürəyi şan-şandır. Amma şükürlər olsun ki, 44 günlük mübarizədə müzəffər ordumuzun, Ali Baş Komandanımızın rəhbərliyi ilə bu böyük zəfərə imza ata bildik. Torpaqlarımızın bir hissəsi də bizdən yeni mübarizə, fədakarlıq istəyir, bunun üçün səfərbər olmalıyıq. Bu gün informasiya məkanında, səngərlərdə daha böyük zəfərlərə hazır olmalıyıq”. 
 
Tədbirin təşkilatçısı qismində çıxış edən Azərbaycan şəhid ailələri və müharibə iştirakçıları İctimai Birliyinin sədri, ehtiyatda olan polkovnik-leytenant Tahir Məmmədovun həmin dövrdə 22 yaşında bölük komandiri kimi iştirak etdiyi döyüşlərdən danışıb.
 
“Birinci Qarabağ müharibəsində Azərbaycan Ordusu təchizat çatışmazlığı problemi ilə üzləşmişdi. SSRİ-nin dörd respublikada yerləşən 366-cı diviziyası Azərbaycana hücum edəndə nizamlı ordumuz yox idi.  O, 10 gün öncə Zəngilanın Şəhidlər Xiyabanını ziyarət edərkən qarşılaşdığı erməni vandalizmindən də söz açıb.  
 
“Şəhidlərin məzarlarının sinə daşlarını deşib qranat atıblar ki, orda da rahat yata bilməsinlər. Həmin kadrları çəkərkən qəhər məni boğdu”.
 
Klassik Xalq Cəbhəsi Partiyasının sədri Mirmahmud Mirəlioğlu isə çıxışı zamanı bildirib ki,  şəhidlərimizin qismən də olsa qisasını almaq bizə nəsib olub. 
 
“Hər birimiz Vətənin bütövlüyü uğrunda şəhid olmağa hazır olmalıyıq. Hələ müharibə bitməyib. Allah bizə bir olub torpaqlarımızı işğaldan tam azad etməyi, bütün şəhidlərimizin ruhunu şad etməyi nəsib etsin. Qazilərimizə təcili şəfa, müzəffər Ordumuza isə hər zaman qalib olmaq arzulayıram”.

1

1

1

1

1

1

1



Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...