Sosial şəbəkələrdə falçı və baxıcılar açıq şəkildə özlərini reklam edərək insanları öz tələlərinə rahat şəkildə sala bilirlər.
Əsasən "İnstagram" sosial şəbəkəsində “məskunlaşan” “göy-göz kosalar” demək olar ki, bu platformalarda at oynadırlar. Çox deyil elə 10 dəqiqə bu platformada səyahət bütün bağlı kartları insanın üzünə açır. Elə bu deyilənləri yoxlamaq üçün sosial şəbəkələrdə bir az araşdırma apardıq. Qarşımıza çıxan mənzərə isə heç də ürəkaçan olmadı.
Elə ilk olaraq özünü cadugər və cindar adlandıran Hacı adlı “İnstagram” istifadəçisi nəzərimizi cəlb etdi. Bu şəxs öz səhifəsində açıq şəkildə şeytani əməllərini təbliğ etməklə yanaşı “xidmətləri”nin qiymətlərini də elan edir. Onların arasında hətta qiyməti 5 min manat olan bir günə ölüm cadusu da var. “Günün qəhrəmanı”nın yazdığına görə, istənilən şəxs, bu məbləği verərək sevmədiyi insanı “öldürə” bilər.
.png)
Məsələ ilə bağlı Ednews-a danışan ilahiyyatçı-alim Tural İrfan bildirib ki, İslam dininə görə cadu da var, üstəlik onun böyük təsiri də var.
“Hətta Peyğəmbərin özünə də cadu edildiyi qeyd olunur. Cadu haram və böyük günah sayılır. Sehr ilə məşğul olan insanların barəsində İslam hüququnda ən ağır cəza nəzərdə tutulur. Lakin dünyəvi dövlətlərdə bu başqa cürdür. Yəni, cadu ilə məşğul olan şəxsdən şikayət olunmadığı, kiməsə qarşı dələduzluq etmədiyi təqdirdə onun fəaliyyətinə mane olunmur”.
İlahiyyatçı həmçinin qeyd edib ki, dində də bəzi ayinlər var ki, onları əksəriyyəti xurafat sayır.
“Məsələn, rukyə deyilən bir ayin var. Bu ayin vasitəsi ilə Quran ayələri oxumaqla ruhi cəhətdən sarsılmış, xəstələnmiş şəxslərə psixoloji dəstək, təskinlik, ruh yüksəkliyi bəxş etmək olur. Bundan başqa həm də onun bədənində olan mənfi enerjini çıxarmaq da mümkün olur. Bu prosesə bəzən "cin çıxarma" deyilir və bu da bəzən xurafat kimi qarşılanır. Elmul - havas, Elmul cifr, Elmul rəml deyilən bəzi metodlar var ki, xəstələnmiş, tibbi cəhətdən çarəsi tapılmayan insanların dərdini müəyyən etmək üçün istifadə edilir. Ancaq bu elmlər tam başqadır və ölkəmizdə bunları mükəmməl bilənlər yoxdur. Bildiyini iddia edənlərin əksəriyyəti dələduzlardır.
Bu elmlər ali riyaziyyat, həndəsə, astronomiya və kimya ilə əlaqəlidir. Əbcəd, cifr kimi metodlarla hesablanaraq müəyyən məsələlərdə qənaətə gəlmək üçün istifadə edilir. Məsələn, böyük filosof İbn Sina Qanun kitabında, böyük teoloq Muhyiddin əl Ərəbi öz əsərlərində bu elmlərdən bəhs edir, istifadə qaydaları haqda məlumat verir. Bu elmlərdən ancaq tibbi və digər ənənəvi vasitələr tükənmiş olduğu zaman istifadə etmək olar”.
T. İrfan bildirib ki, cadu birbaşa şeytanla, şər qüvvələr ilə əlaqəyə girməklə, indiki dildə desək dünyada mövcud olan mənfi enerjiləri müəyyən istiqamətə yönəltməklə kiminsə həyatına təsir etməkdir. Onun sözlərinə görə, Quranda hətta bu işlərin yer üzündə həyata keçirən iki mələyin Harut və Marutdan da bəhs edilir.
“Cadunun təsirindən xilas olmaq, onu pozmaq üçün İslam dinində müəyyən metodlar, qaydalar var. Cadu pozma qaydaları onu etmək qaydası ilə qarışıq salınmamalıdır. Bizim insanların çoxu bu kimi mövzular haqqında geniş məlumatları olmadıqlarından ucdantutma belə məsələlərin hamısına cadu deyirlər”.
Onun sözlərinə görə, cadugərlərin sosial şəbəkələrdə fəaliyyət göstərməsi ilə insanları şeytanın yoluna çəkir və çarəsi tükənən insanlara yalançı ümidlər verib aldadırlar.
“Bəzi Avropa ölkələri kimi bunu öyrənmək üçün kurslar, tədris mərkəzləri yoxdur deyə o sahəni bildiyini iddia edənlər yalançıdırlar. Əgər cadu ilə həqiqətəndə söz verdikləri işləri edə bilirlərsə, o zaman ermənilərin dilini bağlasınlar, Zəngəzur dəhlizi tezliklə açılsın. Yaxud Azərbaycana düşmən olan qüvvələr ondan uzaqlaşsıb, məhv olsunlar. Belə çıxır ki, bunlar ancaq xırda işlələrlə məşğul ola bilirlər. Lakin bəzi məlumatlar var ki, cadu, tilsim, gözəgörünməz ilahi qüvvələrin gücündən istifadə edən bəzi dövlətlər var. Ancaq bu təsdiqini tapmamış məsələdir”.
İlahiyyatçı Elşad Miri isə həmkarının fikirləri ilə razı olmadığını bildirib. O, Ednews-a açıqlaması zamanı həmçinin qeyd edib ki, hazırda bu peşə ilə məşğul olanlar Məhəmməd peyğəmbərə (s) cadu edilməsini əsas gətirərək həm cadunun mövcudluğunu, həm də Peyğəmbərə (s) təsir edibsə görün başqalarına da asanlıqla necə təsir edəcəyi iddiasını ortaya atırlar.
“Təəssüflər olsun ki, bu cür iddiaların səslənməsində günahkarlar biz müsəlmanlarıq, çünki Quranda bunun tam əksi olmasına baxmayaraq, əfsuslar olsun ki, hədis kitabları bu cür rəvayətlərlə boldur. Həmin rəvayətləri araşdırdıqda isə bir sıra ziddiyətli məqamlar ortaya çıxır. Məsələn, Peyğəmbərə (s) cadunun Mədinədə hicrətin 7-ci ilində edildiyi deyilsə də, bilirik ki, Fələk və Nas surəsi artıq illər əvvəl Məkkədə nazil olub. Cadu olmadığı üçün, Peyğəmbərə (s) və başqa insanlara da olmayan bir şeyin edilməsi də mümkün deyil. Əgər sehr olsaydı, Peyğəmbərə (s) də cadu edilsəydi görəsən Peyğəmbər (s) ona istinad edilən sözdəki məsələyə niyə əməl etməyib? – “Hər gün səhər vaxtı yeddi ədəd acvə xurması yeyənə o gün zəhər və sehr zərər verməz”.
E. Miri bildirib ki, uca Allah Quranda Məhəmməd peyğəmbərə (s) cadu edilməsini iddia edənlərin zalımlar olduğunu xəbər verir.
“Peyğəmbərə (s) cadu edilməsi anlayışı heç bir halda doğru deyil və Quranda bildirilən ayələrə də konkret olaraq ziddir”.
Sosial şəbəkədə cadugərliyi təbliğ edən bu şəxslə bağlı Ednews-a açıqlama verən Daxili İşlər Nazirliyinin mətbuat katibi Elşad Hacıyev məsələnin araşdırılacağını bildirib.
Onun sözlərinə görə, bu cür hallar aşkar edildiyi zaman qanuna müvafiq tədbirlərin görülməsi təmin olunur. Bu zərərçəkmişlərin şikayətlərindən və dəyən ziyandan asılıdır.
DİN sözçüsü hər bir halda bunun hüquqa zidd əməl kimi qanunla qadağan olunduğunu və cəza təhdidi yaratdığını qeyd edib.
Gülnar Səlimova
.png)
.png)
.jpeg)
