Beynəlxalq Avrasiya Mətbuat Fondunun ofisində Laçından çıxarılan ermənilərin evləri və meşələri yandıraraq, ekoloji terror aktı törətməsinin qarşısının alınması ilə bağlı vətəndaş cəmiyyəti və qeyri-hökümət təşkilatları nümayəndələrinin birgə müzakirə tədbiri keçirilib. Ednews xəbər verir ki, tədbirdə QHT rəhbərləri, media və vətəndaş cəmiyyəti nümayəndələri də iştirak edib.
Beynəlxalq Avrasiya Mətbuat Fondunun prezidenti Umud Mirzəyev tədbiri giriş sözü ilə açaraq, ilk olaraq həm ekologiya, həm də insanlığa qarşı törədilən erməni vandalizmindən söz açıb. Daha sonra meşə yanğınları və minalarla bağlı Laçının Zabux və Sus kəndlərində erməni vəhşilini əyani şəkildə əks etdirən görüntülər nümayiş olunub.
Umud Mirzəyev, həmçinin qeyd edib ki, baş verənlər 80-ci illərin sonunda ermənilər tərəfindən törədilən Topxana Meşəsi hadisələrinin tam təkrarıdır.
“Bu gün gözünü belə qırpmadan o evləri, meşələri yandırıb onlara qəsd edən ermənilərin Qarabağa heç bir aidiyyəti yoxdur. Onlar vaxtilə Suriya və digər ölkələrdən Qarabağa köçürülən ermənilərdir ki, bu gün heç nə olmamış kimi 30 il qanunsuz yaşadıqları əraziləri viran qoyaraq tərk edirlər. Bu hadisələr mənə 80-ci illərin sonunda ermənilərin törətdiyi Topxana Meşəsi hadisələrini xatırladır.
Qarabağdakı torpaqlar bu gün yararsız vəziyyətə qalıb. Orada ekoloji terror izləri özünü göstərir. Yandırılan evlərin kimyəvi tərkibli dam örtükləri, çirkləndirilən çaylar, qırılan meşələr və ən əsası da son günlərdə basdırılan minalar bütünlükdə bu terrorun əyani sübutudur”.
BAMF rəhbərinin sözlərinə görə, Qarabağdakı erməni vandalizmi qəsdən törədilən hadisədir:
“Ermənilər Qarabağın bərəkətli torpaqları və füsünkar təbiətini məhv etmək üçün əllərindən gələni ediblər. Görürsünüz ki, bu gün orada bir dənə də olsun salamat bina qalmayıb. Normal insan öz yaşadığı məkana bu cür münasibət bəsləməz. Bu təkcə Azərbaycana qarşı törədilən terror deyil, bütün bəşəriyyətə olan erməni düşmənçiliyidir”.
Umud Mirzəyev, həmçinin son günlərdə Laçın və digər boşaldılan ərazilərdə aşkar olunan PM minaları və partlayıcı tələlər barədə də söz açıb.
“Təsəvvür edin, 1 metr ərazidə 10 ədəd mina basdırılıb. Bu insanlığa qarşı bir dəhşətdir. Fikir versəniz, həmin minaların tarixi də son illəri əks etdirir”.
BAMF rəhbəri tədbirdə, həmçinin vətəndaş cəmiyyəti və media qurumlarını bu cür məsələyə diqqət və qayğı ilə yanaşmağa çağırıb:
“Bu gün bu tədbirdə toplaşmağımızın əsas səbəbi Zabux və Sus kəndlərindəki ekoloji terrorla bağlı olsa da, biz bütün Qrabağda mövcud olan yeraltı düşmənimizi də unutmamalıyıq. Təbii ki, bu bəşəriyyətin düşməni olan mina problemidir. Hesab edirəm ki, gələcək görüşlərdə bu problemin beynəlxalq aləmə çatdırılması üçün QHT-lərlə birgə müraciət də hazırlamalıyıq”.
Tədbirdə iştirak edən Avrasiya Miqrasiya Təşəbbüsləri Platformasının İB sədri Azər Allahverdiyev də baş verənlərlə bağlı öz fikrini bildirib. O, ilk öncə bu cür tədbirin keçirilməsində göstərdiyi təşəbbüsə görə BAMF prezidenti Umud Mirzəyevə təşəkkürünü bildirib. Azər Allahverdiyev, həmçinin Vətən müharibəsinə qədər Qarabağda yaşayan ermənilərin dəfələrlə bu cür hadislər törətdiyini vurğulayıb.
“Xatırlayırsızsa, II Qarabağ müharibəsindən sonra ermənilərin Kəlbəcər və digər ərazilərimizdən çıxarılması üçün onlara humanist bir addım olaraq vaxt verdik. Həmin müddət ərzində erməni vandalizmi yenə də susmadı, əksinə tərk etdikləri əraziləri viran qoyaraq, orada gizlin minalar basdırmağa başladılar. Demək faktiki olaraq, bu erməni xalqının xislətini göstərir, onlarda Azərbaycan, türk xalqına qarşı patoloji bir nifrət var və onlar bu nifrəti müxtəlif formada ifadə etməyə çalışırlar”.
Tədbirdə, həmçinin digər QHT rəhbərləri də iştirak edib və baş verənlərin beynəlxalq məhkəməyə çatdırılması, habelə cinayətkarların tezliklə cazalandırılması üçün birgə təşəbbüslərin gücləndirilməsi barədə səylərin bir araya qoyulmasını qeyd ediblər.
Elnur Ənvəroğlu