İyunun 26-da “DAYAQ”ın regional koordinatoru Vüqar Şahbazov layihə meneceri və koordinatorunun göstərişinə əsasən Ağdam rayonunun Əlfətli kəndinə, minadan zərər çəkən ailəyə baş çəkib.
Ednews xəbər verir ki, səfərin əsas məqsədi ailəyə mənəvi dəstək olmaqla yanaşı, Əfətli icması, eləcə də rayonun digər yaşayış məntəqələrində yaşayan, müxtəlif sahələrdə çalışan insanlara mina barədə maarifləndirmə işləri aparmaqdan ibarət olub.
Regional koordinator ailədə olarkən zərərçəkmişlərə və orada iştirak edənlərə mina və partlamamış sursatlarla çirklənmiş ərazilərdə hər hansı fəaliyyətə son qoymaq barədə məlumat verib. O bildirib ki, mütəxəssis olmayan şəxslər üçün mina və partlamamış sursatlarla çirklənmiş əraziləri heç də hər zaman tanimaq mümkün olmur. Bu səbəbdən təhlükəli hesab olunan ərazilərə daxil olunmamalıdır.
Onun sözlərinə görə yalnız bu üsulla zərərçəkənlərin sayını azaltmaq, onların həyatını xilas etmək mümkündür. Bunun üçün hər kəs maarifləndirmə işləri ilə məşğul olmalıdır.
Maarifləndirmə tədbirlərinə əsasən müxtəlif əmək fəaliyyətləri ilə məşğul olan şəxslər, o cümlədən çobanlar cəlb olunmalıdır.
Həmçinin uşaqlar arasında interaktiv səhnəciklər təşkil etməklə, mina və mərmilərdən zərərçəkənlərə təlimlərə dəstək olmaqla maarifləndirmə işinə töhfə vermək mümkündür.
Koordinator bildirib ki, tikinti və sosial sahənin işçilərilə də risklər haqqında geniş söhbətlər keçirilməsi planlaşdırılır.
Xatırladaq ki, 16 mart 2021-ci il tarixində Novruz adətlərini icra edən zaman ailənin beş (5) üzvü – 65 yaşlı Hüseynov Akif Muxtar oğlu (sağ baldırın sınığı), 40 yaşlı Hüseynov Anar Akif oğlu (sol ayağın travmatik amputasiyası), 43 yaşlı Hüseynov Razi Akif oğlu (həlak olub), 34 yaşli Hüseynov Bayram Akif oğlu (həlak olub), 8 yaşlı Hüseynzadə Hüseyin Razi oğlu (psixoloji travma) mina partlayışına düşərək müxtəlif dərəcəli xəsarətlər alıblar.
Təlim zərərçəkənlərin ailəsində baş tutub. Görüş zamanı 2 nəfəri qız, 2 nəfəri oğlan olmaqla 6-11 yaş qrupundan 4 nəfər; 1 nəfər qız, 1 nəfər oğlan olmaqla 12-18 yaş qrupundan 2 nəfər; 3 nəfəri kişi, 2 nəfəri qadın olmaqla 19-35 yaş qrupundan 5 nəfər; 2 nəfəri kişi, 2 nəfəri qadın olmaqla 36-55 yaş qrupundan 4 nəfər; 1 nəfəri kişi, 1 nəfəri isə qadın olmaqla 56 yaş və yuxarı qrupdan 2 nəfər, ümumilikdə 17 nəfər olmaqla qonşuluqda yaşayan şəxslər iştirak edib.
Görüşdə Qızıl Aypara Cəmiyyətinin Tərtər şöbəsinin əməkdaşları, Kərimzadə Zamin Mübariz oğlu, Kərimzadə Səməd Mübariz oğlu da iştirak edərək mina və mərmilərdən qorunma üsullarına dair maarifləndirici söhbət aparıblar.
Sonda iştirakçılara minadan qorunma üsullarına dair 6 ədəd plakat, 10 ədəd broşür və 22 ədəd dəftər təqdim olunub.
