Laçın rayonunun Zabux və Sus kəndlərinə qayıdışa hazırlaşan sakinlər mina və partlayıçı sursatların təhlükəsinə dair maarifləndirilib.
Ednews xəbər verir ki, Avropa İttifaqının maliyyə yardımı, UNİCEF-in Azərbaycan Nümayəndəliyinin və ANAMA-ın dəstəyi ilə “DAYAQ” Qeyri-Hökumət Humanitar Yardım Təşkilatı tərəfindən mina və partlayıçı sursatların təhlükəsinə dair maarifləndirmə tədbiri keçirilib. Həyata keçirilən Maarifləndirmə (PSTM) layihəsi çərçivəsində regional koordinator Zaur Quliyev Ağcabədi rayonunun “Taxta Körpü” qəsəbəsində məskunlaşan Zabux və Sus kəndlərindən olan və oranın inzibati ərazi vahidliyi sayılan Qarakahı və Qızılcadan məcburi köçkün düşən ailələrlə görüşüb. Qeyd edək ki, hazırda “Böyük Qayıdış” Dövlət Proqramında nəzərdə tutulan sakinlərin Laçın rayonunun Zabux və Sus kəndlərinə köçməsi nəzərdə tutulub.
Ağcabədi rayon Peşə Məktəbinin yataqxanasında 23 avqustda keçirilən görüşdə sakinlərə işğaldan azad edilən ərazilərdə mina və partlamamış hərbi sursatlar riskinin olması diqqətə çatdırılıb. Bununla bağlı sakinlərlə maarifləndirmə və müzakirələr aparılıb. Daha sonra maarifləndirici materiallar, dəftərlər paylanılıb, uşaqlara isə mina təhlükəsini özündə əks etdirən oyunlar təşkil edilib. Onlara UNİCEF tərəfindən hazırlanan mina və PHS partlayışlarını əks etdirən və təhlükədən qorunmaq üçün roliklər göstərilib. Maarifləndirmə tədbirləri zamanı 33 ədəd poster, 50 ədəd buklet, stiker, 33 ədəd dəftər, 20 ədəd rəsm dəftəri (özün rənglə) , 2 ədəd oyun pazlı paylanılıb.
Qeyd edək ki, maarifləndirmə tədbirində 33 nəfər iştirak edib. Onlardan 22 nəfər kişi, 11 nəfər qadın, 1 nəfər ümumi səbəbdən əlilliyi olan qadın, 2 nəfər şəhid atası, 1 nəfəri isə 1-ci Qarabağ müharibəsi iştirakçısı (kişi) olub. İştirakçıların 13 nəfərini uşaqlar (10 oğlan və 3 qız) olub.
Tədbirdə İcma lideri Xıdır Rəhimov da iştirak edib.