Bakı şəhərində müntəzəm sərnişindaşıma fəaliyyəti göstərən bir neçə daşıyıcı şirkətlər istifadələrində olan nəqliyyat vasitələrini satışa çıxarıb. Maraqlıdır ki, daşıyıcı şirkətlər istifadələrində olan nəqliyyat vasitələrini satışa çıxarmağına səbəb nədir? 

Bakı şəhərində müntəzəm şəkildə fəaliyyət göstərən Xaliq Faiqoğlu şirkəti də həmçinin öz avtobuslarını satışa çıxarıb.

Bununla bağlı şirkətin mətbuat xidmətinin rəhbəri Nizam Rzayev Ednews-a açıqlamasında bildirib ki, bunun əsas səbəbi sərnişindaşıma sahəsinin düşdüyü çətin durum, dünyada davam edən iqtisadi proseslər nəticəsində aldığımız bütün mal və xidmətlərin, xüsusilə ehtiyat hissələrinin və sair sürtkü yağları, şinlər və digər məhsulların bahalaşması bağlıdır.

“Biz şirkət olaraq avtobus parkımızı böyük ölçüdə yeniləmişik, müasir Avro-6 standartlarına cavab verən komfortlu avtobusları sərnişinlərimizin xidmətinə vermişik. Lakin, 30 qəpiklik gediş haqqı ilə 400-450 min manat dəyəri olan avtobusu işlətmək, kreditləşməni ödəmək, bahalaşmanın qarşısında duruş gətirmək çox çətindir”- deyə bildirib.

Məsələ ilə bağlı nəqliyyat eksperti Eldəniz Cəfərovun da fikirlərini öyrəndik.

“Avtobusların satışa çıxarılması onların biznes məsələsidir. Özəl şirkətlərin bir çoxu qeyd edir ki, onlara hazırki qiymət uyğun deyil. 3 il əvvəl də eyni durum idi. 50 faiz qiymət artımı olsa da, keyfiyyət  getdikcə aşağı düşdü. İctimai nəqliyyatda çalışan özəl şirkətlərə dövlət müəyyən datasiyalar ayırmalıdır. Hazırda dövlət özəl şirkətlərə də dizel datasiyası ayırır. Bakı şəhərində ziyan edən ictimai nəqliyyatda çalışan şirkətlər üçün müəyyən kompensasiya edilməlidir. Hətta bu gün şəhərdə parkinqlərdə qanunsuz olaraq əldə edilən il ərzində 40-50 milyon manatı leqallaşdıraraq oradan yığılan vəsaiti ictimai nəqliyyatda çalışan özəl şirkətlərə datasiya kimi ayırmaq olar” - deyə ekspert bildirib. 

Bakı Nəqliyyat Agentliyinin mətbuat xidmətinin rəhbəri Mais Ağayev məsələdən xəbərdar olduqlarını bildirib. “Bəli, bəzi özəl şirkətlərin üzləşdiyi maddi çətinlikdən xəbərimiz var. Qiymət məsələsinə gəldikdə isə qiymət tənzimlənməsini həyata keçirən qurum Tarif Şurasıdır. Sərnişindaşıma sahəsində xidmətində məsul qurum olaraq Bakı Nəqliyyat Agentliyi isəTarif Şurasına qiymət artımı ilə bağlı heç bir təklif etməyib. Bilirik ki, müəyyən çətinliklər var, amma tədbirlər görülür ki, sərnişin daşınmalarında problem olmasın. Bizim üçün əsas olan dayanıqlılıq və davamlılığın olmasıdır”.