Beynəlxalq Avrasiya Mətbuat Fondunun prezidenti Umum Mirzəyev siyasi analitik Arye Qutun vəfat ilə bağlı nekroloq imzalayıb.
Ednews xəbər verir ki, o, nekoroloqda Arye Qutun İsrail və Azərbaycan arasında əlaqələrin misilsiz rolundan bəhs edib, mərhumun doğmalarına, əzizlərinə, yaxınlarına başsağlığı verib:
“Arye Qutun yoxluğu son dərəcə böyük itkidir. O, İsrail və Azərbaycan strateji tərəfdaşlığı, Cənubi Qafqazda geosiyasi vəziyyəti ilə, Azərbaycan-Ermənistan münaqişəsi ilə bağlı yüzlərlə analitik məqalələrlə çıxış edib. BAMF rəhbəri və rəhbərliyi adından A.Qutun ölümündən kədərlənir, Allahdan ona rəhmət diləyirik”.
Qeyd edək ki, Arye Qut 2 iyun 1975-ci ildə Bakı şəhərində anadan olub. Bakı Dövlət Universitetinin beynəlxalq münasibətlər fakültəsini fərqlənmə diplomu ilə bitirib. Sonra müəllimlik təcrübəsi keçmək məqsədi ilə İtaliyanın Genova Universitetinə göndərilib. Beynəlxalq münasibətlər sahəsində magistr elmi dərəcəsi olan Arye Qut azərbaycan, rus, ingilis, ivrit, türk və alman dillərində sərbəst danışıb.
O, 2000-ci ildə İsrailə köçüb. 2007–2009-ci illərdə Arye Qut Türkiyənin İsraildəki səfiri Namiq Tanın siyasi müşaviri vəzifəsində çalışıb.
Bununla yanaşı, o, İsrail-Turkiyə və İsrail-Azərbaycan münasibətləri sahəsində İsraildə aparıcı mütəxəssislərindən biri kimi tanınıb. Eyni zamanda, Arye Qut İsrailin dövlət radiosunda "Radio Reka" (rus dilində), "Reşet Bet" (ivrit dilində) və İsrailin 9 və 10 televiziya kanallarında daimi siyasi şərhçi kimi çıxış edib.
Arye Qut həm İsrail, həm Azərbaycan mətbuatı ilə fəal şəkildə əməkdaşlıq edib, Türkiyə-İsrail münasibətlərinə, İsrail və Azərbaycan strateji tərəfdaşlığa, Cənubi Qafqazda geosiyasi vəziyyətlə bağlı, Ermənistan-Azərbaycan münaqişəsi ilə bağlı 700-dən artıq analitik məqalələrin müəllifidir.
Mərhum siyasi analtik İsraildə Azərbaycan diasporunun fəal nümayəndələrindən biri olub. O, İsraildəki "Cəmiyyət üçün beynəlxalq layihələr" adlı qeyri-hökumət təşkilatının başçısı idi. Vaxtı ilə "İsrail-Azərbaycan" Beynəlxalq Assosiasiyasının idarə heyətinin üzvü və təşkilatın mətbuat katibi olub. Bununla yanaşı o, İsrail dövlətində "Justice for Khojaly" beynəlxalq kampaniyasınin rəsmi əlaqələndiricisi olub.
2016-cı ildən Arye Qut Bakı Beynəlxalq Multikulturalizm Mərkəzinin İsraildəki nümayəndəliyinin rəhbəri kimi fəaliyyət göstərib. Onun İsrailin Təl-Əviv şəhərindəki "Medial" nəşriyyatında "Ağrı" bədii-sənədli romanı ingilis dilində çapdan çıxıb. İsrailli müəlliflər – ata və oğul - Əmir və Arye Qutun bu əsərində 1992-ci ildə erməni silahlı dəstələri tərəfindən Xocalıda törədilən soyqırımı aktı ilə bağlı dəhşətli hadisələrdən bəhs edilir, müxtəlif dinlərə, müxtəlif millətlərə mənsub olan, müxtəlif mühitlərdə böyümüş, taleyin qismətindən gözəl Bakı şəhərində rastlaşan iki gəncin romantik sevgi tarixçəsi təsvir olunur.
2020-ci ildə Arye Qut BAMF-ın təqdimatı əsasında Azərbaycan Respublikasının Prezidenti İlham Əliyev tərəfindən “Dostluq” ordeni ilə mükafatlandırılıb. O, bu yüksək ordenlə dövlət başçısının kütləvi informasiya vasitələri nümayəndələrinin təltif edilməsi haqqında 22 iyul 2020-ci tarixli Sərəncamına əsasən təltif edilib.
Xatırladaq ki, 2015-ci ilin 25 iyul tarixində “Cəmiyyət üçün beynəlxalq layihələr” qeyri-hökumət təşkilatının rəhbəri vəzifəsini icra edən Arye Qutla BAMF arasında əməkdaşlıq haqqında memorandum imzalanıb.
Memoranduma əsasən, İsrailin "Cəmiyyət üçün beynəlxalq layihələr" QHT-si və BAMF Dağlıq Qarabağ münaqişəsi həqiqətlərinin, Xocalı faciəsinin İsraildə eləcə də digər inkişaf etmiş ölkələrdə təbliğ olunması, tanınması istiqamətində proqramların hazırlanması, analitik yazıların dərc olunması, Qarabağın tarixi, mədəni, mədəniyyətini əks etdirən tədbirlərin keçirilməsi, nəşrlərin hazırlanması həyata keçirilib.
Allah rəhmət etsin!
