Xəbər verdiyimiz kimi, bu gün siyasi analitik Arye Qut uzun sürən ağır xəstəlikdən sonra vəfat edib.
Beynəlxalq Avrasiya Mətbuat Fondunun prezidenti Umud Mirzəyev A.Qutla bağlı xatirələrini Ednews-la bölüşüb:
“Arye mənim dostum idi. Onunla son danışığımız avqustun 8-də olub. Sonuncu mesajında sözləşdik ki, səhəri günü telefonla danışaq. “Yaxşı olmağa çalışıram, sabah zəngləşərik, əzizim Umud bəy”. Ancaq çox təəssüflər olsun ki, ondan sonra hec cür əlaqə qura bilmədik. Son vaxtlar ona tez-tez zəng edirdim, mesajlar yazırdım, amma cavab gəlmirdi. Hiss olunurdu ki, son 1 ay vəziyyəti çox ağırlaşıb”.
Söhbət zamanı Umud Mirzəyev Arye Qutun çox mətin, qeyri-adi iradəyə sahib insan olduğunu da qeyd edib.
“Düşünürəm ki, Aryenin cürəti, güclü müqaviməti olmasaydı o, çoxdan bizi tərk edərdi. Düz 5 il amansız xəstəliyi ilə mübarizə apardı. Arye bir ordu qədər Azərbaycan üçün iş gördü. İnformasiya savaşında onun ölümü həm ölkəmiz, həm də İsrail üçün böyük itkidir. O, İsraillə Azərbaycan arasında əlaqə üçün körpü rolunu oynayırdı”.
Fondun prezidenti dostunu həm də səngər qardaşı adlandırıb. O, A.Qutla Qarabağ xatirələrini belə yada salıb:
“Biz onunla Azərbaycanın bütün səngərlərini qarış-qarış gəzmişdik. Demək olar ki, Aryenin bütün Qarabağ səfərlərində onu mən müşayət etmişdim. Bir-birimizə çox bağlı idik, mən ona, o isə mənə güvənirdi. Bu gün mən səngər qardaşımı itirdim, çox üzgünəm”.
Umud Mirzəyev Aryenin yoxluğunda ona təsəlli verən məqamlardan da danışıb.
“Onun yoxluğunda mənə bir şey təsəlli verir. Nə yaxşı ki, Arye Qarabağın azad gününü gördü. Ağdama, Şuşaya səfər etdi. Yadıma onun Şuşaya gedəndə necə uşaq kimi sevindiyi düşür. O, çox xoşbəxt idi. Bəzən görürdün ki, xəbərim olmadan birbaşa regionlara gedib. Bir dəfə mənə mesaj yazdı ki, “Mixaylo Füzulidə Aşağı Əbdürrəhmanlıdadır”. Bax, Arye belə həyatsevər, şən insan idi. O, əfsanəvi qələm adamı, səngər adamı, həm də yaxşı dost idi”.
U.Mirzəyev Arye Qut arasında keçən maraqlı bir dialoqu da xatırlayıb.
“Biz müxtəlif dinlərə sahib olsaq da, Arye bütün inanclara xüsusi hörmətlə yanaşırdı. Yadımdadır, təzəcə xəstələndə ona dedim ki, sənin üçün qurban demişəm, Bakıya gələndə mütləq onu kəsərik. Arye buna etiraz etmədi. Dedi necə məsləhətdirsə, elə də edərik. Gəldi, biz bir yerdə "Mir Mövsüm Ağa" ziyarətgahında qurbanı kəsdik və bu payı Şəhidlər Xiyabanında çalışan abadlıq işçilərinə, fəhlələrə payladıq. Mən Arye ilə bağlı bu xatirəmi ilk dəfədir ki, ictimaiyyətə açıqlayıram”.
Fondun prezidenti Arye Qutu bu yaxınlarda keçiriləcək BAMF-ın 30 illiyik yubileyindı görməyəcəyini çox təəssüf hissi ilə qeyd edib.
“Mən onun BAMF-ın 30 illiyi ilə bağlı tədbirə qatılmağını çox istəyirdim. Yubiley tədbirlərinə hazırlaşdığımız dövrdə onu itirməyimiz çox üzücüdür. Arye Qutla bizi bir-birimizə bağlayan səngər idi, elə səngərdə də tanış olmuşduq. Çox heyif, bu gün Aryenin yoxluğundan danışırıq.
Mən onun yaxınlarına, doğmalarına, əzizlərinə və Azərbaycana başsağlığı verirəm, hər kəsin başı sağ olsun”.