Milli Məclisdə icbari tibbi sığorta ilə bağlı yeni qanun layihəsi müzakirə olunur.

Yeni qanuna görə, Azərbaycanda taksi sürücüləri, toy tamadaları, çalğıçılar, rəqqaslar, dərzilər və bərbərlər icbari tibbi sığorta ilə əhatə olunacaq.

Onlar 12 manat icbari tibbi sığorta haqqı ödəyəcəklər.

Məsələni aydınlaşdırmaq üçün ilk növbədə İcbari Tibbi Sığorta üzrə Dövlət Agentliyi ilə əlaqə saxladıq. Lakin qanun layihəsinin Milli Məclisdə hələ də təsdiq olunmaması səbəbindən Dövlət Agentliyi məsələ barədə açıqlama vermək səlahiyyətinin olmadığını bildirdi.

Bu məsələni icbari sığorta üzrə ekspert İlkin İbrahimovla müzakirə etdik.

O, Ednews-a açıqlamasında qeyd etdi ki, minimum əmək haqqında icbari tibbi sığorta 4 % təşkil edir. 

“İcbari tibbi sığorta VÖEN-i olan işçilərin minimum haqlarından tutulacaq. Bu da yalnız 4 % civarında təşkil olunur. Əvvəllər minimum əmək haqqı 250 manat idi, həmin əmək haqqını 4% - ə vuranda 10 manat edirdi. Hazırda minimum əmək haqqı 300 manat təşkil edir, belə olan halda 4 %-dən 12 manat tutulur”.

İ.İbrahimov icbari tibbi sığortanın yuxarıda qeyd olunan şəxslərlə bərabər bir çox işçilərə müsbət təsirinin olacağını bildirib.

“İcbari tibbi sığorta ölkə üzrə məcburi xarakter daşıyır. Muzdla işləyən, eyni zamanda VÖEN-ni olan vətəndaşlar bununla bağlı vergi ödəyirlərsə, onda əmək haqlarının bir hissəsi İcbari Tibbi Sığorta Agentliyinin büdcəsinə köçürülməlidir. Həmin şəxslər də bir il ərzində icbari tibbi sığortanın zərfində olan bütün xidmətlərdən pulsuz istifadə edirlər. Burada məcburilik anlayışı ilə yanaşı, əhaliyə keyfiyyətli tibbi yardımla bağlı xidmətlər göstərilir”.

Milli Məclisinin Səhiyyə komitəsinin üzvü Müşfiq Məmmədli açıqlamasında icbari sığorta ilə bağlı eyni fikirləri bölüşüb.

“Müsbət təsiri ondan ibarətdir ki, digər vətəndaşlarla bərabər sərbəst fəaliyyətlə məşğul olan, yəni VÖEN-i olan şəxslər də icbari tibbi sığortanın faydalarından yararlanacaqlar. Burada dediyimiz kimi, faiz nisbəti ilə 12 manat həcmində ödənişlər edəcəklər. Həmin ödənişin hesabına sığorta paketinin xidmətləri onlara da aid olacaqdır”.

Yunis Abdullayev