Ednews tədqiqatçı alim Əhməd Abdo Tarabikin “Beynəlxalq Avrasiya Mətbuat Fondu-Azərbaycan vətəninə otuz illik xidmət” yazısını təqdim edir.

     Bu il Beynəlxalq Avrasiya Mətbuat Fondunun yaradılmasının 30 ili tamam olur. Fond 1992-ci ildə müstəqil qeyri-hökumət təşkilatı kimi yaradılıb, Azərbaycanda QHT-lər haqqında qanuna uyğun olaraq dövlət qeydiyyatından keçib.

     Beynəlxalq Avrasiya Mətbuat Fondu BMT agentlikləri, ABŞ Dövlət Departamenti, Avropa Komissiyası, Dünya Bankı, Beynəlxalq Mətbuat İnstitutu, Beynəlxalq Jurnalistlər Federasiyası, xarici ölkələrin Azərbaycan Respublikasındakı səfirlikləri, Azərbaycanın nazirlik və agentlikləri, o cümlədən yerli və regionda beynəlxalq QHT-lərlə əməkdaşlıq edir.

      Beynəlxalq Avrasiya Mətbuat Fondunun fəaliyyəti “media, vətəndaş cəmiyyətinin inkişafı, qaçqın və köçkünlərlə bağlı problemlər, sülhməramlılıq missiyası və münaqişələrin həlli, habelə təhsil” olmaqla 5 əsas istiqamət üzrə fəaliyyət göstərir. Qafqazda etnik və hərbi münaqişələrin öyrənilməsi və həlli üçün ən yaxşı metodların aşkar edilməsində yaxından iştirak edir.  

      Beynəlxalq Avrasiya Mətbuat Fondunun yaradılması Azərbaycan üçün çox çətin şəraitdə baş verib. Çünki həmin illərdə Sovet İttifaqının dağıldığı ərəfədə Azərbaycan müstəqillik mərhələsinə qədəm qoyurdu və həmin dövrdə baş verən mühüm hadisələrin fəsadları ilə yanaşı, Ermənistanla müharibə və Qarabağ bölgəsinin işğalı üst-üstə düşmüşdü. Bu səbəbdən də belə bir böhranlı zamanda Ermənistanın Azərbaycana qarşı təcavüzü ilə bağlı faktların araşdırılması, eləcə də düşmən işğalı nəticəsində öz yurdunu tərk etməyə məcbur olmuş qaçqın və məcburi köçkünlərə köməklik göstərmək üçün fəaliyyət göstərən quruma ehtiyac var idi.

     Beynəlxalq Avrasiya Mətbuat Fondu otuz il əvvəl Moskvada ictimai qurumun yaradılması təşəbbüsü ilə iyirmidən çox ictimai xadimin iştirak etdiyi çoxsaylı müzakirələrdən sonra yaradılıb. BAMF azərbaycanlıların səsini, onlara qarşı olunan haqsızlıqları, iztirab və ağrılarını beynəlxalq ictimaiyyətə çatdırmaq, erməni işğalının və onun arxasında duran dağılmış Sovet İttifaqı liderlərinin əməllərini dilə gətirmək məqsədi ilə yaradılıb. 

     Beynəlxalq Avrasiya Mətbuat Fondu otuz illik fəaliyyətindəki Azərbaycan xalqına göstərdiyi xidmət nəticəsində böyük uğurlar qazana bilib. Fond ən çətin yollardan keçməklə yanaşı, müxtəlif ictimai fəaliyyət sahələrində ağır mübarizələr aparıb. 

     I Qarabağ müharibəsi zamanı BAMF Azərbaycanın səsini eşitdirməyə və həqiqətləri dünyaya göstərməyə çalışıb. BAMF Azərbaycanla Ermənistan arasında atəşkəs əldə edildikdən sonrakı proseslərdə, habelə  Ermənistanın təcavüzkar qüvvələrinin geri çəkilməsi üçün aparılan uzunmüddətli danışıqlar dövründə də yaxından iştirak edib. Regionda sülhün əldə olunmasında ən böyük rol 2020-ci ildə 44 gün davam edən ikinci Qarabağ müharibəsi zamanı olub. 

     Azərbaycan Milli Ordusunun qazandığı şanlı zəfərdən sonra Beynəlxalq Avrasiya Mətbuat Fondu işğaldan azad edilmiş torpaqların bərpası və yenidən qurulması işlərində də iştirak edir. Ermənilər Qarabağ torpaqlarını işğal etdikləri bütün dövr ərzində yenidənqurma prosesinə mane olub və olmaqdadır.

     Beynəlxalq Avrasiya Mətbuat Fondu onun qurucusu və prezidenti Umud Mirzəyevin rəhbərliyi ilə yarandığı gündən xeyli təcrübə qazanaraq fəaliyyətini davam etdirib. BAMF, şəhid ailələrinə və müharibədə yaralananlara(qazilərə) qayğı göstərməklə yanaşı, onları yeni mənzillərlə təmin olunması və onlara sosial yardım göstərilməsinə xidmət edir.

     BAMF başda Qətərin Əl-Cəzirə Media Şəbəkəsi olmaqla, dünyanın ən böyük media qurumları ilə əməkdaşlıq edir. 

     Xatırladaq ki, fond Əl-Cəzirə Media Şəbəkəsi ilə birgə bir çox fəaliyyətlər həyata keçirib. Xüsusi ilə xarici təlimçilərin Azərbaycana dəvət etməklə, jurnalistlərin bilik və bacarıqlarının artırılması məqsədi ilə birgə təlim programları təşkil edib.

     Ərəb dilindən tərcümə edən: Rəna Mürşüd

Əhməd Tarabik

• Tag:
• Beynəlxalq Avrasiya Mətbuat Fondu
• Vətəni Azərbaycana otuz illik xidmət