44 günlük Vətən müharibəsi xalqımıza 30 ildən sonra unudulmaz qələbə sevinci yaşatdı, öz qəhrəmanlarını bizlərə bir daha tanıtdı. Neçə-neçə igid Vətən övladı ərazi bütövlüyümüz, milli kimliyimiz uğrunda qazi oldu, şəhidliyə ucaldı. Haqqında bəhs edəcəyimiz Elvin Babayev də belə oğullarımızdan biridir.

Təxris edilməsinə cəmi 3 ay qalmış əzəli torpaqlarımızı düşmən işğalından azad etmək Vətən müharibəsi başlayıb. Ağdam və Xocavənd rayonları istiqamətində döyüşən əsgər Elvin Babayev 2020-ci il, oktyabrın 2-də Xocavənddə qəhrəmancasına şəhid olub.

Ednews şəhidin anası Kəmalə Rəhimova ilə müsahibəni təqdim edir:

- Elvinin hərbiyə olan marağı haradan qaynaqlanır?

- Elvinin körpəlikdən hərbi formaya çox böyük marağı var idi. 2 yaşından bəri ona hərbi paltar almağımı istəyərdi, oyuncaq silahlarla oynayardı. Böyüdükcə həvəsi daha da artdı. O, həvəslə Azərbaycan Respublikası Dövlət Sərhəd Xidməti Akademiyasına sənəd versə də, təəssüf ki, qəbul ola bilmədi. Rus bölməsində oxuyurdu deyə, ana dilindən balı çatmadı. Oğlum 9-cu sinifdə oxuyanda məktəbdə hərbi yarış keçiriləndə, orda qalib olaraq, komandir seçilmişdi. Bütün hərbi yarışlara o aparıcılıq edirdi. Məktəb vaxtından silah söküb yığmağı belə bacarırdı.

Oğlum Elvin, sanki mənim xalam oğlumun taleyini yaşadı. Xalam oğlu şəhid Elxan Məmmədov da 23 yaşında şəhidlik zirvəsinə ucaldı. Oğlumda olan həvəs də bəlkə ondan qaynaqlanırdı, qan çəkirdi.

- Oğlunuzun hansı xüsusi, qeyri-adi bacarıqları vardı?

- 7 yaşından futbola gedir və digər idman növlərinə də marağı vardı. Oğlum çox mərd, igid bir əsgər idi. Mayoru Elvin haqda hətta böyük xasiyyətnamə yazmaq istəyirdi. Hər kəs onun savadından və ağlından dolu-dolu danışardı. Oğlum heç bir vaxt yorulmazdı, aktiv həyat sürürdü, tənbəl deyildi. 

- Şəhidlik zirvəsinə yüksəldiyi ana qədər olan döyüş xatirələri barədə nə deyə bilərsiz? 

- Hərbiçi yoldaşının sözlərinə görə, Elvin o qədər mərd və cəsur idi ki, onu belə qoymayıb cəbhə önünə getməyə, deyib ki "sən qal, evin tək oğlusan, anana lazımsan. Ancaq məndən savayı qardaşım da var. O anama baxacaq". Hətta şəhid olmamışdan bir gün qabaq dostuna deyib ki, "artıq şəhid qoxusu gəlir, gəl bu gün daha çox düşmən məhv edək, bəlkə sabah şəhid olduq".

- Yuxularınıza tez-tezmi gəlir?

- Oğlum, yuxuma az-az gəlir. Bir neçə gün öncə yuxuma gəlmişdi. Yuxuda o qədər ucaboy və hündür, üzü nurlanmışdı. Əlimi onun sinəsinə qoyub dedim: "Oğlum, anan qurban..sən axı yaşayırsan". O isə mənə baxdı, gülümsədi. Oğlum şerləri çox sevərdi. Biz də onun üçün bir şairdən şer yazmağını xahiş etmişdik. Təəssüf ki, etinasız yanaşırdı. Lakin günlərin biri qonşular kövrələrək qapımızı döyüb, "bəs Elvinlə bağlı yuxu görmüşük"- dedilər. Qonşu danışır: "Qeyibdən bir səs gəldi. Qara pencəkdə olan bir insan mənə tərəf əlində bir qələm uzatdı və söylədi: "al bu şeiri, sinə daşının üstünə yazılsın". 

Həmin o şeiri təqdim edirik: 

19 yaşımı vurmadım başa, 

Bütün arzularım toxundu daşa. 

Ana, mən gedirəm sən xoşbəxt yaşa,

İndi meylini sal o bir qardaşa.

Söhbətləşdi: Rəna Mürşüd