Oktyabrın 4-də Beynəlxalq Avrasiya Mətbuat Fondunun prezidenti Umud Mirzəyev ABŞ-ın Azərbaycandakı səfirinin siyasi işlər üzrə müşaviri Fil Tissue və ABŞ Beynəlxalq İnkişaf Agentliyinin idarəçilik və iqtisadi dayanıqlılıq şöbəsinin müdiri Angelina Allen-Mpyisi ilə görüşüb. Əvvəl U.Mirzəyev BAMF-ın baş ofisinin qonaqlarını salamlayıb. İlk olaraq o, qonaqlara Fondun 30 illik fəaliyyəti və qurumun regionda həyata keçirdiyi layihələr barədə məlumat verib. Daha sonra tərəflər gələcək əməkdaşlıq prespektivləri haqqında müzakirələr aparıblar. 

 

Söhbətin davamında Fondun prezidenti ABŞ rəsmilərinə ölkə üçün ən böyük problem olan minadan çirklənən torpaqların mahiyyəti və hələ də davam edən təhlükə barədə danışıb. 

ABŞ-ın Azərbaycandakı səfirinin siyasi işlər üzrə müşaviri Fil Tissue öz növbəsində bildirib ki, ölkəsini bu istiqamətdə məlumatlandırmaq üçün daha geniş informasiya almaq ehtiyacı var.

 

Umud Mirzəyev həmçinin qonaqlara erməni separatçılarının 2020-ci il noyabr ayından müharibənin bitməsindən indiyədək Azərbaycan ərazilərində mina yerləşdirmələrinə davam etmələri barədə də məlumat verib.

 

 “Münaqişə bitməlidir, lakin yeni basdırılan minalar birbaşa müharibənin davamı deməkdir. Qeyd edim ki, son bir həftə ərzində 6 nəfər minadan zərərçəkən olub.  Onlardan 2 nəfər həlak olub, biri isı azyaşlıdır. İnsanlar tezliklə işğaldan azad olunan ata-baba yurdlarına geri qayıtmaq istəyirlər. Bu işdə isə ən böyük təhlükəni mina problemi törədir”.

 

Umud Mirzəyev Qarabağ münaqişəsi başlanan ilk gündən indiyə qədər Azərbaycan haqqında yayılan dezinformasiyalardan da danışıb.

 

“Bu gün Azərbaycan Ermənistan tərəfindən sərhədlərinin tanınmasında ən çox maraqlı olan tərəfdir. Ancaq Ermənilərin sərhədyanı ərazilərimizdə törətdikləri təxribatlar dünyaya başqa cür çatdırılır. Dərhal Azərbaycan bir çox ölkələr tərəfindən təzyiqlərlə üzləşir. Bu da olan hadisələr barəsində yayılan yalan məlumatların nəticəsində olur. Sərhəddə başlanan provokasiyalar hər zaman ermənilər tərəfindən həyata keçirilir. Çünki ermənilər beynəlxalq hüquqa görə Azərbaycan ərazilərini tanımaq istəmirlər. Əgər sülh müqaviləsi imzalanarsa, insanların geri qayıtması, minaların təmizlənməsi sürətlənəcək. Bundan sonra insanlar həm də birgə yaşamağa alışacaqlar. Bu proses ləngidikcə, revanşist qüvvələrdə Azərbaycan torpaqlarını yenidən işğal etmələri barədə inam yaradır”.

 

Söhbət zamanı cənab Tissue mina problemi haqqında məlumatları o cümlədən Qarabağ münaqişəsinin tarixi, partlayıcıların Azərbaycan əhalisinə verdiyi psixoloji travma, zərərçəkənlərə verilən dövlət dəstəyi və yaralıların həyat hekayələri ilə yaxından maraqlanıb.

 

Görüşün sonunda ABŞ Beynəlxalq İnkişaf Agentliyinin idarəçilik və iqtisadi dayanıqlılıq şöbəsinin müdiri Angelina Allen-Mpyisi də müzakirələrə qoşulub.  

Daha sonra ABŞ rəsmiləri yaranmasında birbaşa BAMF-ın iştirak etdiyi Azərbaycanda Minadan Zərərçəkənlər Assosiasiyası ictimai birliyinin sədri Rey Kərimoğlu və Qarabağ bölgəsində minaya düşən zərərçəkmiş şəxslərlə görüşüblər.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary