Məşhur meyxanaçı Rəşad Dağlının törətdiyi cinayətin ətrafında gedən söz-söhbətlər hələ də səngimək bilmir. Onun qətl törətməsi sosial şəbəklərin, medianın gündəmini zəbt etməkdə davam edir. Cəmiyyətin meyxanaçıya olan böyük rəğbətinin günü-gündən artması heç də hamı tərəfindən xoş qarşılanmır. Maraqlısı isə müxtəlif təbəqələrdən olan insanların meyxanaçını dəstəkləyib onun törətdiyi cinayəti adi hal kimi qələmə verməyə çalışmalarıdır.

Buna səbəb nədir? Cəmiyyətin meyxanaçıya olan böyük sevgisi, canfəşanlığı nədən irəli gəlir?

Ednews mözvu ilə əlaqədar ictimai şəxslərin münasibətini öyrənib.

Xalq yazıçısı Anar hadisə ilə bağlı geniş fikir bildirməkdən imtina edərək, qısa danışıb:

“Rəşad Dağlının qətl törətməsinin və cəmiyyətdə ona qarşı olan rəğbətə münasibətim yoxdur. Bu mövzu ilə qətiyyən maraqlanmıram, maraqlı da deyil”.

Milli Məclisin deputatı Azər Badamov isə açıqlamasında deyib ki, heç kimə insan qətlə yetirməsinə icazə verilmir. Hər kəs törətdiyi cinayət əməlinə görə qanun qarşısında cavab verməlidir.

“Rəşad Dağlı barəsində də çox düzgün olaraq həbs qətimkan tədbiri seçilib. İstintaq prosesi başa çatmamış ona müəyyən insanların dəstəyi var deyə azadlığa buraxmaq da qətiyyən düzgün deyil. İnsanlar arasında müxtəlif mövzularda mübahisələr olur. Rəşad Dağlının qonşusu ilə mübahisəsi də necə baş verdiyini və onu bıçaqlayaraq qətlə yetirməsinə nə vadar etdiyini istintaq müəyyənləşdirəcək. Təbii ki, proses nəticəsində onun əməllərində hansı səviyyədə cinayət əməlləri olduğunu müəyyənləşdiriləcək. Yekun qərarı isə məhkəmə verəcəkdir. Rəşadı “qəhrəman”laşdıranlara da istintaqın başa çatmasını gözləməyi tövsiyə edirəm. Bu gün cəzasız qalan cinayət əməlləri sabah daha böyük cinayətlərin baş verməsinə yol aça bilər. Hüquqi dövlətdə yaşayırıq və hər kəs qanun qarşısında bərabərdir. Kiminsə yaxşı sənəti var deyə, onun qanuna zidd olaraq törətdiyi cinayəti bağışlamaq olmaz”.

Sosioloq Əhməd Qəşəmoğlunun sözlərinə görə, bizdə ümuməm cəmiyyətdəki prosesləri öyrənmək, arzu olunan, ahəngdar istiqamətdə yönləndirmək üçün vacib olan elmi araşdırmalar aparılmır. Belə Elmi Mərkəzlər yoxdur.

“Sosioloji arşadırmaların mahiyyəti lazımi şəkildə dərk olunmur. İctimai rəy amilinə əhəmiyyət verilmir. Amma, günü-gündən mürəkkəbləşən və həssaslaşan cəmiyyətdə bunsuz keçinmək mümkün deyil. Bu kiminsə tibb elminə əhəmiyyət vermədən insanların sağlamlığını yaxşılaşdırmaqdan danışmasına bənzəyir. Belə münasibətin nəticəsidir ki, cəmiyyətdə insanların  davranışında, ictimai rəyində kortəbii amillər daha çox rol oynayır. Cəmiyyətdə gərginlik artır, gözlənilməz hallar baş verir. Ona görə də tezliklə, elmi əsaslarla cəmiyyəti belə xaotik inkişafdan xilas etmək lazımdır. Belə cəmiyyətdə formalaşmış sosial təbəqələrin davranışı, ictimai rəylər xeyli təəcüb doğurması təbiidir. Bu proseslərin qarşısını inzibati metodlarla almaq qeyri mümkündür və təhlükəlidir. Həssslaşmış cəmiyyət həssas elmi texnologiyalar tələb edir”.

Oğuz Ayvaz