Bu gün Türkiyənin “İnsani Yardım Vakfı” (İHH) təşkilatının Humanitar diplomatiya şöbəsinin məsul əməkdaşı Mehmet Altıntaş və Mərkəzi Asiya və Qafqaz bürosunun nümayəndəsi Hamza Nedimoğlu Beynəlxalq Avrasiya Mətbuat Fondunun qonaqları olublar.

Ednews xəbər verir ki, BAMF-ın prezidenti Umud Mirzəyev qonaqları fondun Bakı ofisində qarşılayıb. O, ilk olaraq qonaqları ofislə yaxından tanış edərək onlara Azərbaycanın çətin dönəmlərində yaradılan beynəlxalq statuslu qeyri-hökumət təşkilatının bu günə qədər fəaliyyəti və həyata keçirdiyi layihələr barədə məlumat verib.

Görüş əsnasında Umud Mirzəyev həmçinin təşkilatın mina problemi ilə bağlı bir sıra mühüm layihələrdə iştirakından da söz açıb. O, işğaldan azad edilən Qarabağ əraziləri, keçmiş təmas bölgəsi və bir sıra kənd və qəsəbələrdə mina təmizlənmə prosesində komanda fəaliyyəti barədə də danışıb. Daha sonra uzun illərdir humanitar sahəda çalışan iki qurum arasında gələcək əməkdaşlıq perspektivlərilə bağlı müzakirələr aparılıb.

Qeyd edək ki, “İnsani Yardım Vakfı” (İHH) təşkilatı dünyanın müxtəlif ölkələrində müharibədən, təbii fəlakətlərdən və yoxsulluqdan əziyyət çəkən insanlara yardım edərək öz missiyasını həyata keçirir. Onlar son illər Azərbaycanda da fəaliyyətlərini genişləndirərək dayanıqlı layihələrə imza atmaqdadırlar.