Belə ki, Azərbaycan Dövlət İnformasiya Agentliyinin (AZƏRTAC-ın) ölkəmizdəki bəzi ideoloji strukturlar kimi bir çox hallarda müasir çağırışlardan və Azərbaycan Prezidentinin tələblərindən geri qalırdı. Digər tərəfdən qonşu ölkələrin müvafiq dövlət agentliklərini müqayisə etdikdə və paralellər aparanda AZƏRTAC çox zəif görsənir. Türkiyənin "Anadolu" Agentliyi ilə müqayisə olunacaq səviyyədə deyil.

İstər Rusiya, istərsə də Türkiyənin dövlət xəbər agentlikləri ölkə mətbuatında lokomotivdir və onlarla rəqabət aparmaq heç də hansısa özəl xəbər agentliyinin hünəri deyil. Lakin Azərbaycan Dövlət İnformasiya Agentliyinin (AZƏRTAC) ölkə daxilində rəqabətdə nəinki, "APA" və “Report”a, hətta “Turan”a belə uduzur.

Böyük imkanlar fonunda zəif fəaliyyət

AZƏRTAC böyük bir informasiya maşını olmasına baxmayaraq, illik büdcəsi 10 milyon manatdan artıqdır. 200-dən artıq ştata malikdir. Bu azmış kimi, ötən ilin dekabr ayında agentlik üçün Bakının Atatürk prospekti, 70 ünvanında inşa olunmuş 9 mərtəbəli bina istifadəyə verildi. Ən müasir texnoloji avadanlıqların və ofis inventarlarının quraşdırıldığı yeni binada yaradıcı və texniki heyətin səmərəli fəaliyyəti üçün hər cür şərait yaradılıb.

Binada beynəlxalq standartlara uyğun xəbər zalları, multimedia vasitələri ilə təchiz olunmuş studiyalar qurulub, operativ dəyirmi masa, teleizləmə sistemi təşkil edilib.
Binada müxtəlif tədbirlərin keçirilməsi üçün sinxron tərcümə avadanlığı ilə təchiz edilmiş 180 yerlik konfrans zalı, 90 yerlik yeməkxana, zəngin ədəbiyyat fondu olan kitabxana, tibb və idman otaqları yaradılıb. Bir sözlə, AZƏRTAC-dakı şəraitə dünyanın istənilən aparıcı xəbər agentliyi qibtə edə bilər.

Ednews Bizim media-ya istinadən xəbər verir ki, lakin bütün bu resursların fonunda Agentliyin iş əmsalı 0-a bərabərdir. Hazırda ölkəmizdə 200-dən artıq xəbər portalı fəaliyyət göstərir.

Bu qədər xəbər portalından 1-i, yaxud 2-si gün ərzində AZƏRTAC-a istinadən xəbər yayımlayar. Amma analoji agentliklərin xəbərləri istənilən xəbər saytının gündəlik nəşrində ən azı 15-20 faiz yer tutur.

Hələ onu demirik ki, dövlət agentliyinin yayımladığı xəbərlərin oxucusu da yoxdur. Bəlkə elə ona görədir ki, agentlik xəbərlərin oxunma sayını gizlədir.

Agentlik 5-6 dildə xəbər yayımlayır, dünyanın müxtəlif ölkələrində 21 müxbir məntəqəsi var, amma bu 21 məntəqədən gün ərzində bəlkə də 21 dənə orijinal xəbər yayımlanmır. Bütün bu imkanlara baxmayaraq bərbad tərcümələr və müxtəlif dillərdən “copy past” xəbərlər bu gün AzərTac-ın real vəziyyətinin göstəricisidir.

AZƏRTAC informasiya cəhbəsində

Bu gün AZƏRTAC ancaq nazirlərin, icra başçılarının şəninə “güzgü tutur”. Gün ərzində yayımlanan xəbərlərin 70-80 faizi “bəy tərifi” və yaxud “dalay-dalay”dır. Bəsit olduğu qədər yersiz, yersiz olduğu qədər başdansovdu xəbərlər sıralanıb gedir. Həmin andaca digər agentliklərin bir neçəsinin səhifəsinə baxırıq. Xəbər lentlərində digər məsələlərlə yanaşı, ölkə başçısı İlham Əliyevin son xarici səfərlərinin yekunları ilə bağlı rəylər, hesabatlar yer alıb.

Etiraf etmək lazımdır ki, 44 günlük müharibədə AZƏRTAC sinifdə qaldı. Xalq-rəhbər birliyinə və Azərbaycan ordusunun tarixi hünərinə bu qurum arzulanan güzgünü tuta bilmədi. Əhali daha çox Türkiyə agentliklərindən informasiya alırdı.

Səbəbsə o idi ki, Aslan Aslanov ətrafına peşəkarları yox, daha çox özünə yaxın hesab etdiyi, Əli Həsənovun dəsti xəttini davam etdirən kadrları cəlb etmişdi.

Bu isə onu sübut edir ki, bu qurumda ciddi islahatlara ehtiyac var idi. AZƏRTAC-da iş sistemi elə qurulmalıdır ki, dövlətin verdiyi imkanlar hesabına qısa zaman kəsiyində nəinki regional, hətta dünya səviyyəli agentliyə çevrilsin.

Ona görə öz missiyasını yaxşı dərk etməyən AZƏRTAC rəhbərliyi bu gün ancaq və ancaq cılız görünən məlumatları cəmiyyətə ötürmək üçün səfərbər olub. Bu, belə olmasaydı, insanları narahat edən hansısa xəbər, problem agentliyin səhifəsində özünə yer tapardı.
Ümumiyyətlə, mükəmməl analitik yazılar, araşdırma məqalələr, müasir çağırışlara cavab verən xəbər siyasəti AZƏRTAC-ın işində demək olar ki, hiss edilmir. Hələ biz cəmiyyəti düşündürən problemlərin qabardılmasını demirik.

Məhz bu səbəblərdən dolayı, Aslan Aslanov sözün əsl mənasında qocaldığı,71 yaşında pensiyaya getmək vaxtı çatdığı üçün vəzifəsindən azad edildi.