Bakı sakinləri Milli Parkda və mərkəzi küçələrdə ağızlıqsız köpək itlərinin gəzdirilməsindən şikayətçidir. Onların əsas narazılığı köpək itlərinin parklarda gəzdirilməsinin onların istirahət hüququna mane olması, gigiyena və təhlükəsizlik baxımından səmərəli olmamasıdır. Həmçinin onlar ətrafdakılar üçün təhlükə mənbəyi ola bilər.
Maraqlıdır ki, itləri şəhərdə ağızlıqsız gəzdirənləri hansı cəza gözləyir?
“Bununla bağlı Nazirlər Kabinetinin 2011-ci ildə qəbul olunan 38 nömrəli qərarı var. Bu qərar əsasında qaydalar müəyyən olunub. Qanunvericilikdə ev heyvanlarının saxlanması qaydaları ilə bağlı qərar mövcuddur. Bu qaydalar əsasında bu ev heyvanlarının saxlanma şərtləri,heyvan sahiblərinin hüquq və vəzifələri qeyd olunub”.
Bu sözləri Ednews-a açıqlamasında hüquqşünas Elşad İsayev bildirib.
“Qaydalarda birbaşa göstərilir ki, ev heyvanları saxlayan şəxslər ərazinin sabitliyini, insanların təhlükəsizliyini qorumağa məcburdurlar. Bu əslində hər birimizin narahat olduğu, günün aktual mövzularından biridir. Bəzən olur ki, o itlər təkcə ağızlıqsız deyil, həm də açıq şəkildə də gəzdirilir. Bu da əhalinin haqlı narazılığına səbəb olur. Qaydalarda da qeyd olunub ki, əhaliyə narahatlıq verməmək şərti ilə onların saxlanılmasına icazə verilir”.
Hüquqşünas həmçinin bildirib ki, qaydalarda ev heyvanları saxlayan şəxslər heyvanlarının peyvənd olunması, quduzluğa qarşı tədbirlərin həyata keçirilməsi kimi məsələləri diqqətdə saxlamalıdır.
“ Qayda pozanlar cinayət məsuliyyətinə deyil , İnzibati məsuliyyətə cəlb olunur. İnzibati Xətalar Məcəlləsinin 290-cı maddəsində həmin şəxslərə 200 manata qədər cərimələnə bilər. Əgər bu qayda pozuntusu təkrarlanarsa, həmin şəxs 300 manat məbləğində cərimə olunacaq. Sağlamlığa hər hansı zərər dəyərsə 800-1000 manat məbləğində cərimələnə bilərlər.Düşünürəm ki, bu qaydalar sərtləşdirilsə daha yaxşı olar”.
Heyvanların Müdafiəsi İctimai Birliyinin rəhbəri Fərid Mansurov Ednews-a açıqlamasında bildirib ki, Nazirlər Kabinetinin müvafiq qaydalarına görə ev heyvanlarının saxlanılması və gəzdirilməsi ilə bağlı olan qaydalara görə itləri ağızlıqsız insanların gəzdiyi parklarda gəzdirmək olmaz.
“Bu qaydalarda qeyd olunub ki , itlər onlar üçün xüsusi olaraq ayrılan gəzinti meydançalarında ağızlıqsız gəzdirilə bilər. 2011-ci ildə bu qərar təkmilləşdirilib. Artıq 10 ildən çoxdur ki, şəhərdə bu cür park və gəzinti meydançalarının inşa olunmasına şərait yaradılmayıb.
O həmçinin bildirib ki, ölkədə belə gəzinti meydanları olmadığına görə bu qaydaların da heç bir hüquqi qüvvəsi yoxdur.
“Mən fürsətdən istifadə edib Heyvanların Müdafiəsi İctimai Birliyinin rəhbəri olaraq Bakı İcra Hakimiyyətinə müraciət edirəm ki, bütün civil dünyada olduğu kimi Bakıda da itlər üçün xüsusi gəzinti meydançaları ayrılsın. Üstəlik bu qanunun tələbidir. Lakin həyata keçməsi üçün bu parklar mövcud olmalıdır. Ona görə xahiş və tələb edirik ki, müvafiq qurumlar qanunun tələbini yerinə yetirərək şəhərdə bu meydançaları yaratsınlar”.
Ayan Rzayeva
