Son zaman müzakirə olan mövzulardan biridə Azərbaycanda dərmanların baha olmasıdır.
Sosial şəbəkə istifadəçisi Anar Salamov bu barədə şikayətini belə ifadə edib.
“Atam üçün lazım olan və Türkiyədə 150 manata olan xərçəng xəstələri üçün dərman Azərbaycanda 350 manatadır. Bu bizi çox çətin vəziyyətə salır. Əgər orada 150 manata başa gəlirsə, Azərbaycanda bunu bu qiymətə satmaq vicdandan deyil”.
İqtisadçıların fikrincə, məsələdən çıxış yolu preparatlara tətbiq olunan 18% ƏDV-nin ləğv olunmasıdır.
Bəs, görəsən təklif olunan bu qərar tətbiq olunarsa, dərman bazarına necə təsir göstərər?
Məsələ ilə bağlı Ednews-a danışan iqtisadçı Natiq Cəfərli bildirib ki, artıq 1 ildir ki, bu təkliflə çıxış ediblər.
“96% dərman preparatları ölkəyə xaricdən gətirilir. Nəinki əlavə dəyər vergisi həm də dərmanlar üçün gömrük rüsumu da var. Bu doğru deyil. Bundan başqa Tarif Şurasının dərman preparatlarının qiymətlərinin tənzimlənməsi qaydası da yanlışdır. Bu inhisarçılığa yol açır. Ölkəyə keyfiyyətsiz dərmanların gətirilməsinə səbəb olur. Çünki orada molekula görə tənzimlənmə mexanizmi var ki, bu da yanlışdır. Bu qanun ümumiyyətlə ləğv edilməlidir. Bundan əlavə Gömrük rüsumları da sıfırlanmalıdır. Əlavə dəyər vergisi də satışda 18 faizdən 2 faizə salınmalıdır”.
İqtisadçı bildirib ki, dəfələrlə bu təklif səsləndirilib. Amma təəssüf ki, hələ də bununla bağlı hər hansı bir tədbir görülməyib.
Ayan Rzayeva
