Sosial şəbəkələrdə ictimai nəqliyyatda gediş haqlarının artırılması mövzusu müzakirə olunur. Hətta bu dəfə qiymətlərin 85 qəpiyə qədər artacağı haqda qeyri-rəsmi xəbərləri yayılır. Sərnişin daşıyan şirkətlərin rəhbərləri bunu daşıma xərclərinin gediş haqlarından ən azı dəfələrlə baha olması ilə əlaqələndirirlər. 

Məsələ ilə bağlı Bakı Nəqliyyat Agentliyinin mətbuat xidmətindən Ednews-a bildirildi ki, qurumun tarif tənzimlənməsi məsələlərinə müdaxilə etməyə səlahiyyatı yoxdur.

Nəqliyyat eksperti Aslan Əsədov açıqlamasında bildirib ki, daşıyıcı şirkətlərin rəhbərləri qiymət artımına meyillidirlər. 

“Bu məsələnin gündəmdə qalmasını istəyirlər. Amma maraqlıdır ki, sərnişin daşıyan şirkətlər hansı yeniliklər edir, sərnişinlər bu xidmətdən nə dərəcədə  razıdırlar? Düşünürəm ki, sərnişindaşıyan şirkətlərin xərclərinə baxdıqda qiymət artımını başa düşmək olur. Çünki Azərbaycanda avtobusların ehtiyyat hissələri istehsal olunmur. Onlar başqa ölkələrdən xarici valyutalarla daşınır. Bu da öz təsirini sərnişindaşıma xidmətində təsirini göstərir”.

O, həmçinin tıxac problemindən də danışıb.

“Son zamanlar gündəmdən çıxmayan tıxac məsələsinə də diqqət yetirməliyik. Sərnişindaşıma ilə məşğul olanlar fikir verməlidir ki, tıxaca görə nə qədər insan sıxlıqda gedir. Yay mövsümündə kondisoner məsələsi problemi yaranır. Qiymət artımı üçün vətəndaşlar hələ sosial cəhətdən hazır deyil”.

İqtisadçı-ekspert Rəşad Həsənovun fikrincə isə bəzi iqtisadçılar kiçik həcmli qiymət artımlarının iqtisadiyyatı irəli apardığı qənaətinə gəlirlər. Amma bu məsələ ilə heç bir əlaqəsi yoxdur.

“Bu günkü vəziyyətdə qiymət artımlarının tərəfdarı ola bilmərik. Bu eyni zamanda əhalinin bütün sosial qruplarına, o cümlədən, aşağı gəlirli təbəqəyə ciddi təsir göstərəcək. İnflyasiyanın mövcud olduğu dövrdə nəqliyyat şirkətləri öz işçilərinin əməkhaqlarını dövrün tələblərinə uyğunlaşdırmaq istəyirlər”.

Ekspert həmçinin bildirib ki, bu gün aztəminatlı ailələrdən danışırıqsa hökumət bu məsələyə müdaxilə etməlidir.

“Onlar daimi şəkildə ictimai nəqliyyatdan istifadə edirlər. Gediş haqlarında artım olarsa kütləvi yoxsullaşmaya gətirib çıxara bilər”.

Qeyd edək ki, məsələ ilə bağlı Tarif Şurası ilə əlaqə saxlamağa çalışsaq da suallarımız cavabsız qaldı.

Ayan Rzayeva