Zamanla sosial şəbəkələrdə və veb saytlarda qarşımıza müxtəlif xoşağəlməz reklam xarakterli təbliğat kampaniyaları ilə bağlı postlar çıxır. Bu cür postlar bəzən açıq şəkildə, bəzən isə qapalı formada sosial şəbəkələrdə yayımlanırlar.
Ən pis halı isə uyğunsuz hesab olunan, bu cür xüsusiyyətə malik olan reklamlar və bildirişlər günü-gündən artmağa davam etməsidir. Bu proses necə baş verir və qarşısını necə almaq olar?
Məsələ ilə bağlı Ednews-la fikirlərini bölüşən İKT üzrə ekspert Elvin Abbasov bu məsələnin qarşısının hər bir halda alınmasının mümkün olmadığını bildirib:
"Hazırda brauzerlər pornoqrafik və erotik kontentlərin tam aşkarlanmasına imkan verir. Amma bu saytın tərkibi ilə də əlaqəlidir. Əgər həmin kontentlər reklam panosu kimi pop pəncərədə çıxırsa, avtomatik manevr olaraq tənzimlənə bilir. Yox, əgər xəbər saytları, yaxud vizual kontentlərdə qarşımıza çıxırsa, həmin saytlar "Google", "Yandex" kimi brauzerlərdən aldıqları "iframe" (sayta baxışı çoxaltmaq məqsədilə alınır) ilə baş verir. Bu "iframe"lərin əsas məqsədi bundan ibarətdir ki, bir saytdan digərinə nə qədər keçid olursa, eynisi də digəri üçün keçərlidir. Sözügedən "iframe"lər kontentin tərkibindəki teqləri alır və süni intellektə məlumatlar bunlara uyğun olaraq verilir".
Ekspert bu prinsiplə həmin kontentin daxilndəki məzmunla bağlı olaraq "iframe"-lərin dəyişdiyini də vurğulayıb:
"Əgər kontentdə tibbi məlumatlar varsa, bu zaman "iframe"lər tibb yaxud tibbə oxşar məlumatlar qarşımıza çıxarır. Yaxud əgər erotik teqlər, yaxud məlumatlar varsa, bu zaman uyğun olaraq belə kontenti əks etdirən məlumatlarla üzləşəcəyik".
E. Abbasov "Pop-up" bildirişlərin tənzimlənməsi məsələsinə də toxunub:
"Əgər bildirişlər "Pop-up" şəklində gəlirsə, bu zaman istifadə etdiyiniz veb-brauzuerin tənzimləmələr bölməsindən onları deaktiv vəziyyətə gətirmək mümkündür".
Məsələ ilə bağlı Rabitə və Yüksək texnologiyalar nazirliyinə rəsmisi Pərvanə Əliyeva bildirib ki, internet üzərindən yayılan reklamlara qurum cavabdeh deyil.
"İnternet üzərindən olan uyğunsuz reklam kontentinə Rabitə və Yüksək texnologiyalar nazirliyi nəzarət etmir. Əgər dövlət sirrləri və onun əleyhinə hesab olunan qadağan olunmuş məlumatlar paylaşılarsa, bu zaman mövzuya bizim qurum tərəfindən baxış keçirilərək müdaxilə edilə bilər".
Nəzrin Eldarqızı