DİM sədri Məleykə Abbaszadə bildirib ki, sürücülük imtahanlarının Dövlət İmtahan Mərkəzinə verilməsini təklif edib.
Məlumat üçün qeyd edək ki, hazırda imtahanlar Baş Dövlət Yol Polisi İdarəsi tərəfindən həyata keçirilir. Məsələ gündəmə bir neçə dəfə gəlsə də ancaq müzakirə səviyyəsində qalıb.
Bəzi ekspertlər də sürücülük imtanlarının DYP-dən alınıb DİM-ə verilməsi məsələsinə dövlət proqramı çərçivəsində baxılmasının daha məqsədəuyğun olduğunu bildirir. Lakin məsələnin digər aspektləri də var.
Belə ki...
İmtahanlar DİM tərəfindən keçirilərsə...
Dövlət İmtahan Mərkəzi bir neçə aydan bir 200-300 nəfərin iştirakı ilə dövlət qurumlarının, nazirliklərə işə qəbul üçün imtahanlar keçirir. Qurumda bunun üçün çox ciddi hazırlıqlar prosesi aparır. İşə xeyli sayda əməkdaş cəlb olunur, imtahanın keçirilməsi üçün məkanlar kirayəyə götürülür və texniki işlər görmək üçün də vəsaitlər xərclənir. Ancaq sürücülük vəsiqəsinin alınması üçün verilən imtahan həftədə bir-iki dəfə keçirilir və sürücü olmaq istəyən 5-10 nəfər gedib imtahan verirlər. Belə olan təqdirdə bu iş DİM-ə verilsə, gərək onda vətəndaş sürücülük vəsiqəsi almaq üçün ən azı 3 ay imtahanın keçiriləcəyini gözləsin.
Ekspertlərin rəyi...
Nəqliyyat eksperti Aslan Əsədov Ednews-a açıqlamasında bildirib ki , sürücülük imtahanlarının Dövlət İmtahan Mərkəzinə verilməsi çox maraqlı və gözlənilən qərar idi.
“Çünki son zamanlar imtahanlarla və qeydiyyat şəhadətnamələri ilə, nəqliyyat vasitələrinin qeydiyyata alınması ilə bağlı məlumatlar dolaşırdı. Bu da dövlətin son zamanlar bu sahədəki boşluqları doldurmaq istəyini göstərir”.
Ekspert bildirib ki , hər hansı nəqliyyat vasitəsi istifadə edən şəxs bu qaydaları, onun işləmə prinsipini də bilməlidir.
“Həmin şəxs problemlə üzləşdikdə onun təmir olunma üsullarından bilgili olmalıdır. Hesab edirəm ki, bu imtahanların DİM-in nəzarətinə keçməsinin bir sıra nəticələri olacaq. İmtahan prosesində sualların sayı artırıla bilər.Düşünürəm ki bu imtahan prosesi bir mərkəzdə olsa daha yaxşı olar. Nəzəri və praktiki imtahanlar eyni qurum tərəfindən idarə olmalıdır.
Onun sözlərinə görə əgər praktiki imtahanlar üçün ərazi də lazım olarsa hər hansı sürücülük şirkətləri ilə müqavilə də imzalana bilər.
“Sürücülük məktəbləri ilə bağlı həll mexanizmləri də hazırlana bilər. Birbaşa sürücülük vəsiqəsinin verilməsi ilə bağlı n bir sıra dəyişiklklərə səbəb olacaq.Söhbət təkcə minik avtomobillərindən getmir. Sürücülük vəsiqəsi dedikdə yük maşınlarının da vəsiqələri də nəzərdə tutulur”.
Təhsil eksperti Kamran Əsədov da imtahanların DİM-də keçirilməsi fikrini dəstəkləyənlərdəndir. O, bu barədə Ednews-a bildirib ki, Dövlət İmtahan Mərkəzi şəffaf, obyektiv və ədalətli imtahan keçirən bir qurumdur.
“ Onlar yalnız imtahanın test mərhələsini həyata keçirirlər. Hazırda DİM-in nəzarətində olan bütün imtahanların şəffaflığı, heç bir şübhə altında deyil. Bu gün sürücülük vəsiqəsi almaq üçün çox təəssüf ki, neqativ hallar müşahidə olunur. Son zamanlar Azərbaycanda hər gün onlarla yol-nəqliyyat hadisələri baş verir. Buna səbəblərdən biri də sürücülük vəsiqələrinin çox asan və qanunsuz yollarla əldə edilməsidir”.
Ekspert həmçinin sürücülük vəsiqələrinin həmin şəxslərə düzgün şəkildə verilməsini təklif edib.
“Düşünürəm ki, Dövlət İmtahan Mərkəzi bu istiqamətdə işlər görməlidir. Bizim problemin həlli üçün sualların kim tərəfindən idarə olunması yox, bacarıqların yoxlanılmasıdır. DİM imtahanların yalnız test mərhələsini həyata keçirə bilər. Insanlar o imtahanın testlərini əzbərləməklə bu test imtahanından keçə bilərlər. Amma bu həll yolu deyil. Məsələ biliyin yox, bacarıqların yoxlanılmasıdır. Yol hərəkətləri ilə bağlı bir sıra nişanları ilə bağlı suallara cavablandırmaq mümkündür. Düşünürəm ki, test mərhələsini Dövlət İmtahan Mərkəzi həyata keçirməlidir. Bacarıqların yoxlanılmasını prosesini isə ekspertlərin iştirakı ilə müstəqil bir quruma vermək lazımdır”.
Onun sözlərinə görə bu gün ciddi problemlərdən biri avtomobillərin idarə olunması ilə bağlıdır.
“Dünya ölkələrinin təcrübələrindən yararlanmaq lazımdır. Sürücülük vəsiqəsi imtahanları Dövlət İmtahan Mərkəzinə verilməsi bu prosesdə şəffaflanma yaradacaq”.
Ayan Rzayeva
