2022-ci ilin bitməyinə sayılı günlər qalıb. 2023-cü ilin rəng trendləri artıq müəyyənləşib. Qarşıdan gələn yeni il şübhəsiz ki, özü ilə bərabər bir sıra yeniliklər gətirəcək. Xanımlar bu mövsümün tələblərinə uyğun olaraq qarderoblarını da dəyişməli olacaqlar.
Maraqlıdır ki, 2023-cü ildə hansı geyim tərzləri və rənglər dəbdə olacaq ?
Modelyer Leyla Əhmədova 2023-cü ilin ən son dəblərindən Ednews-a danışıb. O, ilk olaraq, “Dovşan ili”nin ən özəl rənglərindən söz açıb.
"2023-cü ildə rəng üslublarına nəzər salsaq qırmızı, narıncı, xakki rəngləri 2023-cü ildə dəbdə olacaq. Bahar fəslində mavi və açıq bənövşəyi rəngi bu il də öz aktuallığını qoruyacaq".
İlin dəbi XƏZ...
Leyla Əhmədova həmçinin qeyd edib ki, 2023 ildə qadınların vazkeçilməzi yenə də xəz olacaq.
“Həm xəz həm də digər materiallardan olan gödəkçələr (jiletlər) plaşlar, xanımlarımızın qarderoblarında həmişəki yerini qoruyub saxlayacaq. Gündəlik həyatımızda rahatlıqla geyindiyimiz, cins şalvarlardan karandaş adlandırdığımız modeller bu ilin dəbi olacaq. Eyni zamanda geniş ətəkli şalvarlar da gündəmdə qalacaq”.
Moldelyer bildirib ki, bu il daha çox enli çiyinləri olan geyimlər, gödəkçə formasında olan pencəklər, qarın hissəsi görünən korset köynəklər də bu il göz önündə olan geyimlərdən olacaq.
O, xanımlara ipək və dəri materialında olan geyimlərə üstünlük verməyi tövsiyə edib.
“Yanvar-mart aylarında xəzlər xanımların qarderobunun vazkeçilməzlərindən olacaq. Bu il sözsüz ən çox dəbdə olan parçası Lazer kəsimli dəri üzərində milli naxışlarla bəzədilən yeni üslubda olan geyimlər olacaq”.
Ayan Rzayeva