Adların insan həyatında xüsusi rolu vardır. Körpələrə qoyulan adlar mənasına uyğun olaraq uşaqların xarakterinin formalaşmasına, psixologiyasına böyük təsir edir. Körpələrə ad seçərkən həm onun səslənməsinə, həm də mənasına diqqət yetirmək lazımdır. Həmçinin belə hallar boşanmalara belə gətirib çıxardır.
Ad, soyad və ata adının dəyişdirilməsi hansı hallarda mümkündür?
Vəkil Tural Həsənli Ednews-a bildirib ki, şəxsin ad, soyad və ata adının dəyişməsi ilə bağlı mövcud qanunvericilik aktlarımızda fərqli nüanslar nəzərdə tutulmuşdur.
“Azərbaycan Respublikası Mülki Məcəlləsinin 26-cı maddəsində qeyd edilir ki, hər bir fiziki şəxsin adı ad, soyad və ata adından ibarətdir. Ailə məcəlləsində uşağa ad və soyadın verilməsi valideynlərin razılığı əsasında həll edilməlidir. Ola bilər ki, uşağa ad və soyad verilməsində valideynlər arasında fikir ayrılığı olsun. Belə olduqda məsələ qəyyumluq və himayə orqanı tərəfindən həll olunur. Ailə məcəlləsinin müvafiq maddəsində yazılır ki, uşağın ad və soyadının dəyişdirilməsi ilə bağlı valideynlərinin birgə xahişinə əsasən bu məsələ yerli İcra Hakimiyyəti orqanı tərəfindən həll oluna bilər”.
Qeyd edək ki, vaxtı ilə valideynlərin səhvən qəribə adlar verdiyi şəxslər sonralar öz adlarını dəyişdirməyə çalışırlar.
T.Həsənlinin sözlərinə görə, Azərbaycan Respublikası vətəndaşlarının öz adını, ata adını və soyadını dəyişdirməsinə 18 yaşına çatdıqdan sonra yol verilir.
“Bunun üçün yerli İcra Hakimiyyəti orqanlarına və Azərbaycan Respublikası hüquqlarından kənarda daimi və il ərzində 182 gündən artıq müvəqqəti yaşayan şəxslər barəsində isə Konsulluq idarəsinə müraciət etməklə məsələ öz həllini tapa bilər. Ola bilər ki, İnzibati orqana şəxsin ad, soyad və ata adının dəyişməsi ilə bağlı müraciət olunsun və inzibati orqan bununla bağlı imtina barədə qərar qəbul etsin. Belə olduqda bu qərar haqqında məhkəməyə şikayət verilə bilər”.
Tural Həsənli həmçinin onu da bildirdi ki, ata adının dəyişdirilməsi qeydə alınarkən yetkinlik yaşına çatmayan şəxs barəsində ata adı dəyişdirilməlidir. Yetkinlik yaşına çatan şəxs barəsində isə yalnız həmin şəxsin ərizəsinə əsasən bu məsələ həll olunur.
Aparılan maarifləndirmə və təbliğat işlərinə baxmayaraq, Azərbaycanda bəzi valideynlər yeni doğulan uşaqlara qəribə adlar qoymağa davam edirlər. Azərbaycan Respublikası Qanunverici aktlarına uyğun olaraq uşağın mənafeyinə xələl gətirən, cinsə uyğun olmayan gülünc adları qoymaq olmaz.
Aynurə Mustafayeva
