Son 10-15 ildə Azərbaycanda fəaliyyət göstərən televiziyaları bir-biri ilə reytinq üzrə böyük rəqabət içindədirlər. Bu tendensiya isə efirə bayağı ifaçılarının, musiqilərin ayaq açmasına səbəb olur.

Bu isə cəmiyyətdə fəaliyyət göstərən telekanalların sərt tənqid olunmasına gətirib çıxardır. Belə ki, televiziyada yayımlanan verilişlərdə baş verən neqativ hadisələr, qalmaqallar tamaşaçıları Azərbaycan televiziyalarından uzaqlaşdırıb. Bundan əlavə televiziyalar yenicə formalaşan azyaşlıların da maarifləməsində, musiqi zövqlərini formalaşmasında bilavasitə rol oynayır.

Maraqlıdır, Sovet dönəmində televiziyalara tədbiq olunan senzura yenidən gündəmə gətirilməlidirmi?

“Hansısa bir yanlışlığa görə senzura haqqında düşünmək düzgün deyil”.

Bu sözləri professor Qulu Məhərrəmli Ednews-a açıqlamasında bildirib.

“Ümumiyyətlə yazılı mətbuata, saytlara heç bir senzura qoyula bilməz. Biz o mərhələni keçmişik. Sadecə peşəkarlığı artırmaq lazımdır. Efirin öz qızıl qaydaları var və hamı ona əməl etməlidir. Bu qaydalara əməl etmək onların borcudur. Məşhur söz var ki, Amerika xalqını televiziya formalaşdırıb. İndi o fikirdən yanaşsaq bizdə bəlli bir təbəqə vardır ki, onları televiziya formalaşdırıb. Bu senzura ilə başa gələn deyil. Onsuzda televiziya müəyyən mənada nəzarət altındadır. Bizə senzura yox peşəkar televiziyaçılar lazımdır”.

Xalq şairi Vahid Əziz isə Qulu Məhərrəmlidən fərqli düşünür. Onun sözlərinə görə, özəl telekanalların hamısı bağlanmalıdır.

“Senzura hər zaman olmalıdır. Azərbaycan cəmiyyətinin əxlaqını pozan özəl televiziya kanallarıdır. Bütün özəl televiziya kanalları pul arxasınca qaçır”.

Nəğməkar şair həmçinin onu da qeyd edib ki, hər bir televiziya kanalının sezurası olmalıdır.

“İnsanın içində senzura olmalıdır, yada ki, mütləq senzura lazımdır”.

Aynurə Mustafayeva