Bu gün bir çox mobil nömrə istifadəçiləri sahib olduqları nömrənin başqa şəxs tərəfindən whatssap hesabı açılmağı ilə bağlı şikayətlər edirlər. Nömrə bir şəxsin istifadəsində olduğu halda başqa şəxslər tərəfindən sosial media hesablarına giriş olunur. Məsələn Whatsapp hesabını açmaq üçün nömrəyə nəzarət həmin şəxsin əlində olmalıdır. Maraqlıdır ki fırıldaqçılar bunu necə bacarır?
Məsələ ilə bağlı Bakcell şirkətinin mətbuat xidmətindən Ednews-a bildirilib ki, Bakcell şirkəti “WhatsApp” proqramından istifadə üçün yalnız mobil internet şəbəkəsini təmin edir və "Meta" şirkətinə aid bu messencerdən istifadə ilə bağlı məsuliyyət daşımır.
“Eyni zamanda, hesabınızı dələduzlardan qorumaq üçün telefonu nəzarətsiz qoymamaq, WhatsApp-dan qeydiyyatdan keçmək üçün nömrəyə göndərilən 6 rəqəmli şifrəni heç kimlə bölüşməmək və digər ümumi təhlükəsizlik qaydalarına əməl etməyiniz tövsiyə olunur”.
“Nar” mətbuat xidmətindən Ednews-a açıqlamasında bildirildi ki, "Nar" olaraq abunəçilərimizə üstün xidmət keyfiyyəti ilə yanaşı abunə məlumatlarının təhlükəsizliyini də təmin edirik.
“"Nar" abunəçilərinin məlumatlarını heç bir halda üçüncü tərəflərə ötürülmür”.
Məsələ ilə bağlı suallarımıza aydınlıq gətirən İT mütəxəssisi Elvin Abbasov qeyd edib ki, nömrələri saxta yollarla çıxarmaq mümkündür. “İnternet üzərindən bu xidmətlər mövcuddur. Hər hansı virtual nömrə əldə etməklə istənilən sosial media hesabını açmaq mümkün olur. Bu nömrələrə mesaj gələndə onu orada qeyd etmək olur”.
O, həmçinin qeyd edib ki, saxta hesabların açılması hətta sosial media hesablarının oğurlanmasında da bu saxta nömrələr istifadə olunur. “Amma şərtdir ki, bu saxta nömrələr istifadə olunan nömrə olmamalıdır. İstifadədə olan nömrələrdə GSM xəttlərinin öz daxili protokollarında müəyyən boşluqlar ola bilir. Bundan istifadə edib nömrələrə gələn mesajları təsdiqləmək olur. Bu bir az həm də texniki məsələdir. Araşdırmaq lazımdır ki, Azərbaycanda GSM nömrələri bu protokollar əsasında açıqdırmı? Bu kimi ha çox satın alınmamış nömrələrdə baş tutur”.
Onun sözlərinə görə virtual nömrələr əldə edərək bu nömrələr vasitəsilə sosial media hesablarından saytlardan qeydiyyatdan keçmək mümkündür.
“Bu sistemdən illeqal olaraq istifadə olunur. Texnoloji baxımdan bu mümkündür. Amma mövcud nömrə üzərindən hər hansı bir şəxsin istifadəsində olan nömrənin saxta profilini yaratmaq və o gələn mesajı təsdiq etmək çətin məsələdir”.