Bakının bir sıra rayonlarında, xüsusilə Abşeron rayonunun Qobu, Hökməli, Atyalı, Sulutəpə qəsəbələrində yollar yağan qar nəticəsində bərbad vəziyyətə düşüb.

Redaksiyamıza verilən məlumatlara görə, Hökməli ilə Qobu qəsəbələri arasındakı Koroğlu prospektini bürüyən qar yerli sakinlər tərəfindən təmizlənib və intensiv yağan qar zamanı qəsəbənin yollarında heç bir texnika və qum tökən maşın görünməyib.

Bundan başqa, Abşeron rayonunun Hökməli və Qobu qəsəbələrində yerli sakinlər kanalizasiya xətlərinin olmamasından da şikayətləniblər.

Onların sözlərinə görə, bir sıra məhəllələr əriyən qar nəticəsində bataqlığa çevirilib. Ən maraqlısı isə sakinlərin bu məsələ ilə bağlı şikayətlərinə Abşeron İcra Hakimiyyəti ilə bərabər, digər aidiyyəti orqanlar tərəfindən baxılmamasıdır.

Bakının mərkəzinə xüsusi diqqət göstərildiyi halda şəhərin digər rayonları nə üçün diqqətdən kənarda qalıb?

Ednews bu məsələni aydınlaşdırmaq üçün Abşeron İcra Hakimiyyətinin mətbuat xidməti ilə əlaqə saxlayıb.  Qurumun mətbuat xidmətinin rəhbəri Seymur Qasımbəyli açıqlamasında sakinlərin şikayətlərini təkzib edib.  O, qeyd edib ki, rayonun qəsəbələrində qar təmizlənməsi ilə bağlı ciddi tədbirlər görülüb.

“Rayonumuzda qəsəbələrarası yolların qardan təmizlənməsi istiqamətində artıq işlərə başlanılıb. Yolların buz bağlamaması üçün duz və qum maşınları da göndərmişik. Bunu sübut etmək üçün əlimizdə kifayət qədər foto və videolar da var”, – deyə o, qeyd edib.

Kanalzasiya xətlərinin olmaması ilə bağlı yerli sakinlərin şikayətlərinə gəlincə isə Seymur Qasımbəyli bu problemin İcra Hakimiyyətinin məsuliyyətində olmadığını  və sakinlərin aidiyyatı qurumlara müraciət etməli olduğunu vurğulayıb.

Qeyd edək ki, 9 yanvar tarixindən yağan qar Hökməli və Qobu yollarında qalın buz qatı formalaşdırıb. Həmin yol Lökbatan, Güzdək və Qızıldaş qəsəbələrinə gedən ağır yük avtomobillərinin ən çox istifadə etdiyi yollardandır.

Fotolardan da göründüyü kimi məhəllələr arası yollar da buzlanma müşahidə edilib.

Yunis Abdullayev