Ölkə ərazisində 60 gündən artıq müvəqqəti yaşayan vətəndaşların qeydiyyata alınması ilə bağlı qanunvericilik paytaxtda və onun ətrafında tikilən çıxarışsız evlər məsələsini yenidən gündəmə gətirib.
Məsələ barədə əmlak üzrə ekspert Elnur Fərzəliyev Ednews-a açıqlamasında bildirib ki, bu qərar özü əsas verir ki, yaxın gələcəkdə sənədləşmə prosesi yenidən start götürsün:
“Vətəndaş yaşayır, lakin yaşayış yerinin çıxarışı yoxdur. Çıxarış olmayanda ünvan almaq çətinləşir, mümkündür, amma çətindir. Əgər vətəndaşın orada yaşadığını sübut edən amillər varsa yəqin ki, bu qərar həmin ərazilərə mülkiyyət hüququnun verilməsi ilə bağlı olacaq, yaxud da onların qeydiyyata alınması məsələsinə təkan verəcək. İllərdir evlərin sənədləşməsi prosesi gedir. Nəinki, Bakı ətrafı, şəhərin mərkəzində də, Yasamalda, Papanin, Kubinka, Sovetski adlanan ərazilərdə elə evlər var ki çıxarışı hələ də yoxdur.
Ekspert qeyd edib ki, bununla bağlı birbaşa aministiya tətbiq olunmalıdır:
“Çıxarışın verilməməsinin səbəblərindən biri də həmin ərazilərdə torpaqların təyinatının fərqli olmasıdır. Evlərin sənədləşdirilməsi prosesi həm dövlət, həm də vətəndaş maraqlarına xidmət edir. Dövlətə vergi ödənilmədiyi üçün büdcə uduzur, bələdiyyələr də vergilərdən yararlana bilmir, həmin evlər sığortalanmır, ipotekaya, kreditə çevrilə bilmir, vətəndaş əmlak üzərindəki hüquqlarından məhrum olur”.
Ekspert vurğulayıb ki, qərar tətbiq edilərkən evinin çıxarışı olmayan vətəndaşlar mütləq nəzərə alınmalıdır.
Törə Zeynallı