Son zamanlar sosial şəbəkələrdə təhsil ocaqlarında baş verən müəllim-şagird münasibətlərinin görüntüləri yayılır. Bu artıq neçənci dəfədir ki, məktəblərdə təhsil müəssisələrinə yaraşmayan hadisələrin şahidi oluruq. Müəllimlər şagirdləri öz övladları kimi görmür, yoxsa şagirdlər müəllimlərin onların ikinci valideyni olmasını istəmirlər? Bu videoların yayılmasında müəllimlərin nüfuzdan salınmasının səbəbi nədir?
“Müəllim-şagird arasında belə münasibətlər hər zaman olacaq. Bu gün texnologiya dövrüdür. Fərqli-fərqli münasibətlər ictimailəşməsi məktəbin müəllimin nüfüzuna xələl gətirir”.
Bu sözləri Ednews-a açıqlamasında təhsil eksperti Elşən Qafarov bildirib.
Ekspert problemin başlıca səbəbini nizam-intizam qaydalarını tənzimləməyən məktəb nizamnamələrin olmamasında görür. Onun sözlərinə görə istənilən fəaliyyət hüquqa əsaslanmalıdır.
“Azərbaycan Respublikası 32 ildir müstəqildir. Ölkədə hazırda 4432 məktəb var. Bu 4432 məktəblərin heç birinin nizamnaməsi yoxdur. Nizamnamələrdə müəllimlərlə, şagirdlərlə, valideynlərlə münasibətlər tənzimlənməlidir. Təhsil Nazirliyinin 6 noyabr 2014-cü il tarixli Kollegiya iclasında müəllimlərin etik davranış qaydaları təsdiq olunub”.
O qeyd edib ki, hazırda baş verənlər sonuncu hadisə deyil.
“Bundan sonra da belə hadisələr baş verəcək. Bunun qarşısını almaq üçün məktəblərdə bütün münasibətləri hüquqi səviyyəyə gətirməliyik. Valideynlər təhsil prosesində tərəfdaş olduğu üçün qaydalar eyni zamanda müəllimlərə də şamil olunur. Valideyn övladını məktəbə yazdırarkən ərizədə məktəbin nizamnaməsinin qaydalarını əməl edəcəyinə öhdəlik götürür. Əgər bu öhdəlik yerinə yetirilməzsə anlaşma da pozulmalıdır”.
Sosioloq Lalə Mehralı isə bildirib ki, sanki müəllimləri nüfuzdan salmaq üçün yarış gedir.
“Bunun planlı, yoxsa kortəbii şəkildə baş verməsi haqqında, dəqiq bir söz deyə bilməyəcəm. Vəziyyət çox qarışıqdır. İnsanların nə istəyib-itəmədiyi bir qədər şübhəli qalır. Əgər valideynlər övladlarının normal şəkildə təhsil almasının tərəfdarıdırlarsa, birinci növbədə müəllimi baş tacı etməlidirlər”.
Onun sözlərinə görə, hazırda məktəblərdə vəziyyət 10 il əvvəlkindən fərqlidir.
“Əgər valideyn övladının yanında müəllim haqqında pis sözlər işlədirsə, müəllimin hökmünün olmaması haqqında övladı ilə danışırsa bu müəllimləri onun gözündə nüfuzdan salır. Başlıca səbəb budur. Əvvəl valideynlər övladlarının
gözündə müəllimi ilahiləşdirirdilər. Vaxtı ikən valideynlər bizə göydə Allah, yerdə müəllim deyirdilər. Müəllimin dediyi bizim üçün qanun idi. Valideynlər də övladlarının yanında müəllimin tərəfini həmişə saxlayırdılar”.