Bu ildən banklarda əmanət saxlayan vətəndaşlar da vergiyə cəlb olunacaqlar. Belə ki, yeni qaydaya əsasən banklarda fiziki şəxslər əmanətləri üzrə ödədiyi illik faiz gəlirlərindən 10 % dərəcə ilə verdi ödəyicisinə çevriləcəklər.  Sözügedən gəlirlər  sonuncu dəfə 2016-ci il fevralın 1-dən 7 il müddətinə vergidən  azad olunub. 

Maraqlıdır ki, banklara yatırım edən əmanətçilərə bu qaydanın tətbiq olunmasına nə lüzum var idi? Bu əmanətçilərə və banklara necə təsir edəcək?

Məsələ ilə bağlı Ednews-a şərh edən iqtisadçı Əkrəm Həsənov bildirib ki, əmanətçi bankdan əldə etdiyi gəlirdən vergi verməlidir.   

   “Bu qanun əslində  həmişə olub.  Sadəcə 2016-cı ildə devalvasiya baş verdi və nəticədə xaos yarandı. Əmanətlərin bankdan çıxarılma təhlükəsi var idi. Dövlət də bunu nəzərə alaraq  7 il müddətində əmanətçiləri bu vergidən azad etdi. Bu müddət də artıq başa çatıb”.   

O, qeyd edib ki, hər bir əmanətçi  bankdan əldə etdiyi gəlirə görə vergi verməlidir. 

“Məsələn banka  10 min manatı 10 faizlə əmanət qoyuram. Bu da ildə min manat deməkdir. Dövlət də bu min manatdan yüz manat vergi çıxacaq. Harada işləyirsənsə əldə etdiyin gəlirdən dövlətə vergi ödəməlisən. Bu normaldır”.  

Mütəxəssisin fikrincə, əgər bir vətəndaş heç bir əziyyət çəkmədən pulları bankda saxlayıb gəlir əldə edirsə bundan mütləq vergi verməlidir.

“Burada söhbət əmanətdən yox, əmanətin üzərinə gələn faizdən gedir. Bütün dünyada olduğu kimi bizim ölkədə də belə bir qanun var. Yəni əmanətçinin digər  vətəndaşda üstünlüyü nə ola bilər ki? Yəni fəhlə aldığı 500 manatdan vergi verməlidir amma əmanətçi yox?”

Əkrəm Həsənov qeyd edib ki,  bu qərarın nə banklara, nə də  əmanətçilərə heç bir mənfi təsiri olmayacaq.  

“Vətəndaş gəlirindən 10 faiz vergi verməklə heç  nə dəyişməyəcək. İnanmıram ki, əmanətçilər bundan sonra əmanətlərini bankdan geri çıxarsınlar”. 

Ayan Rzayeva

• Tag:
• vergi
• bank