Türkiyədə baş verən zəlzələdən sonra Azərbaycanda sosial şəbəkələrdə yeni tikilərlə bağlı müxtəlif fikirlər səsləndiril. Bir qrup insan Azərbaycanda tikilən binaların da keyfiyyətsiz olduğunu buna görə də bazarda qiymətlərin sürətli şəkildə düşəcəyini, bir qrup insan isə əksinə bizim binaların Türkiyədən fərqli daha dözümlü olduğunu qeyd edir.
Bəs Azərbaycanda tikilən binalar Türkiyədən fərqli olaraq keyfiyyətli materiallardan istifadə edilirmi? İnşaat sektorunda qiymət azalması müşahidə ediləcəkmi?
Bu barədə Ednews-un suallarını əmlak məsələləri üzrə ekspert Ramil Qasımzadə cavablandırıb.
“Mən hesab edirəm ki, bugün hələ də tələb təklifi qat-qat üstələdiyindən qiymətlərdə hər hansı dəyişiklik gözləmirəm. Adətən belə hadisələr müvafiq dövr üçün olur. Düzdür, insanlarda hazırda qorxu var ki, bizdə zəlzələ olanda belə hadisələr baş verə bilər. Bizdə Türkiyədə inşa edilən binalardan fərqli olaraq tikinti normalarına riayət olunur. Tikintilərə dövlət nəzarəti var. Məsələn Türkiyədə görüntülərdən görürük ki, on ikilik armaturlardan istifadə edilir. Halbuki, ən azı on altılıq armaturdan istifadə edilməlidir. Ən azından bizdə binalar bizim gözümün qarşısında inşa edilir. Biz istifadə edilən materialların nə qədər keyfiyyətli olmasını müşahidə edə bilərik. Görə bilirik ki, binanın inşasında neçəlik armaturlardan istifadə edilir. Ölkəmizdə tikilən binalara həm dövlət tərəfindən nəzarət var, həm də ictimai nəzarət də var.
Həm yeni tikililərin, həm də köhnə tikililərin qiymətləri keçən il artdı. Hardasa 20-25 faiz artım oldu. Keçən il 1 kvadratı 1500 manata almaq olurdusa indi 2 mindən aşağı qiymətə almaq mümkün deyil. Hazırda bizdə nə qiymət artımı nə də qiymət azalması müşahidə edilməyəcək. Azərbaycanda hər zaman 4-5 ildən bir qiymət artımı olur sonra stabil bir dönəmə keçir. Sonra yenidən qiymət artımı olur. Hazırda biz qiymətlərin stabil olduğu dönəmdəyik. Ola bilər ki, yay aylarında qiymətlər nisbətən azala bilər. O da ənənəvi xarakter daşıyır. Bunu qeyd etməliyik ki, hazırda bazarda təklif tələbi ödəmir. Ona görə nə qiymət artımı nə də azalması gözlənilmir”.
Əbülfət Baxşəli
