Xəbər verdiyimiz kimi, Ukrayna Ali Radasının bir qrup deputatı parlamentə 8 Mart - Beynəlxalq Qadınlar, 1 May – Beynəlxalq Əmək və 9 May - Qələbə Günlərinin qeyd olunmasından imtina ilə bağlı qanun layihəsi təqdim ediblər. SSRİ-ni simvolizə edən 1 May Günü Azərbaycanda çoxdan ləğv olunub, 8 Martla bağlı isə hər il müzakirələr açılsa da, rəylər birmənalı olmur. Qələbə gününə gəlincə, Azərbaycanın öz QƏLƏBƏ günü var - 8 noyabr Zəfər Günü...
Azərbaycanda soveti, sosializmi simvolizə edən bayramları ləğv etməliyikmi? Ednews bu barədə tanınmış ictimai şəxlər arasında sorğu keçirib. Cavabları təqdim edirik.
Millət vəkili Fazil Mustafa Ednews-a açıqlamasında bildirdi ki, bayramlar məsələsinə indiki zamanda formal xarakter kimi baxılmalıdır.
“8 Mart bayramının heç bir zərəri yoxdur. Qadın hüquqlarının müdafiəsi istiqamətində bir çağırış günüdür. Bu günü biz yersiz, səviyyəsiz formada “Gül” bayramına, “Qadınlara hədiyyə vermək” bayramına çevirmişik. Amma “Hüquq vermə” bayramına çevirə bilməmişik. 8 Martı öz anladığımız, qavradığımız Şərq anlayışı ilə davam etdiririk. “Qadına rüşvət vermə” bayramı kimi qiymətləndiririk. Qadının hüququnu, şərəfini qorumaq, ucalığını təmin etmək kimi anlayışa çox vaxt sahib olmuruq. Ona görə də anlayışımız dəyişməlidir”.
Deputat digər bayramlara da toxundu. Onun sözlərinə görə, 1 May da zəhmətkeşlərin bir anım günüdür. İstəsələr qeyd edə bilərlər.
“Dövlət və kütləvi səviyyədə qeyd etməyin bir mənası yoxdur. Digər tərəfdən 9 May indiki Rusiya ilə münasibətlər zəminində baxılmalıdır. Məncə, bu məsələyə də toxunmaq olmaz. Ukraynada verilən, atılan addımın bizlə əlaqələndirilməsini doğru hesab etmirəm. Azərbaycan öz maraqlarından çıxış etməlidir.
Yazıçı Səfər Alışarlının sözlərinə görə isə Azərbaycandan sovet bayramlarını müasir rus idarəçiliyi ilə bir yerdə süpürüb atmaq lazımdır. Sovet dövründə rus buradakı sosial vəziyyətə görə məsuliyyət daşıyırdı.
“Adamlar öz şikayətlərini Kremlə ünvanlayıb cavab və ədalət tələb edirdilər. İndi rus bizdəki heç bir sahəyə görə məsuliyyət daşımır, ancaq hazır milyardlarımızı əlimizdən alıb sümürür. Prinsip ondan ibarətdir ki, keçmiş sovet respublikalarında xalqın vəziyyəti nə qədər pis və ağır olsa, Moskva üçün bu, bir o qədər əlverişlidir. Yəni öz hakimiyyətindən əli üzülən bu türk xalqlarını təzədən asanlıqla qaytarıb SSRİ boyunduruğu altına salmaq mümkün olar. Məsələn, bizdə niyə uşaq pulu verilmir? Və ya niyə yaşlı əhalinin 90 faizi 300 manat pensiya ilə dolanmağa məhkum edilib? Elə bilirsiniz, Azərbaycanın pulu yoxdur? Var. Azərbaycanın pulunu korrupsionerlər büdcədən və müxtəlif vasitələrlə xalqın boğazından çıxarıb rusa, ingilisə və başqalarına yedizdirirlər. Məsələn, Parisdə Luvr muzeyini, Romada orta əsr qəbirstanlıqlarını, Həştərxan, Pyatiqorsk, Jeleznovodsk, Krasnodar, Moskva şəhərlərində yararsız hala düşmüş yaşayış binalarını, bit basmış Bolqarıstanda türkün yenilmək rəmzinə çevrilmiş qalanı və sairi təmir edirlər. Bu layihələrə milyardlarla Azərbaycan vəsaiti xərclənir. Media sovet bayramları ilə yox, belə real şeylərlə məşğul olmalıdır”.
Oğuz Ayvaz