Xəbər verdiyimiz kimi 7 məsciddə qadın mollalar fəaliyyət göstərəcək. Bu barədə Dini Qurumlarla İş üzrə Dövlət Komitəsinin açıqlamasında bildirilib.
Maraqlıdır, islamda qadın mollaları məscidlərdə necə fəaliyyət göstərə bilərlər? Dində bu barədə hansı qanunlar var?
Mövzu ilə bağlı Ednews-a açıqlamasında ilahiyyatçı Tural İrfan qeyd edib ki, qadın din xadimlərinin məscidlərdə fəaliyyətə başlaması çox gözəldir. Dini Qurumlarla iş üzrə Dövlət Komitəsinin bu sahədə gördüyü işlər təqdirəlayiqdir. Əvvələr bu işlər pərakəndə, qeyri rəsmi aparılırdı.
“Bəzən dindən, Qurandan xəbəri olmayan ağçı qadınlar yas yerlərində tüğyan edir, ağı deyir, mərsiyələr oxuyur, savadsız söhbətlər edir, xurafat yayırdılar. Bir çox halda da İranı təbliğ edirdilər. İndi Dini Qurumlarla iş üzrə Dövlət Komitəsinin sayəsində rəsmi qadın din xadimləri təyin edilir. Xalqımızın adətlərinə görə yas məclislərində qadınlar üçün də maarifləndirici, aparıcı şəxs olmalıdır. Buna da el arasında qadın mollası deyirlər. Habelə məscidlərdə qadınlar da ibadətə gəlir. Onlar üçün də dini ayinlərin icrası üçün qadın din xadiminin olması yaxşı haldır”.
T.İrfan əlavə edib ki, bu, həm xurafatdan, İrana bağlılıqdan yaxa qurtarmaq üçün, həm də dini işlərin ümumi nizamı üçün yaxşı haldır.Həmin qadın mollalara Dini Qurumlarla iş üzrə Dövlət Komitəsi tərəfindən aylıq rəsmi yardım da ayrılır. Daha mollalar ölü sahibindən zorla, bəzən də müxtəlif bəhanələrlə pul tələb etməməlidir.
“Çünki əvvəllər öz dolanışıqlarını bəhanə edib yas sahibindən pul alırdılar. İndi onlara aylıq, normal məvacib ayrılır. Ona görə mollalar yas sahibindən pul tələb etməsələr daha savab olar. Ölü sahibi imkanı daxilində onlara müvafiq ianə versə bu məqbuldur. Quran pulla satılmaz. Hər bir müsəlmana vacibdir ki, vəfat etmiş müsəlman üçün lazımi işləri icra etsin. Daha bu işə görə pul tələb etmək olmaz. Odur ki, qadınların da bu işlərdə rəsmi təyinat alması ümid edirəm ki, bəzi boşluqları dolduracaq”.
Oğuz Ayvaz