Xaricdə təhsil almaq bir çox gəncin xəyalıdır. Hazırda demək olar ki dünyanın dörd bir yerində təhsil alan azərbaycanlı gəncləri var. Lakin hər şey göründüyü kimi çox da asan olmur. Ailələrindən uzaqda təhsil almağa gedən tələbələr bir çox problemlərlə üzləşirlər.
Ən çox da ilk zaman yayılan bu problemlər tələbələr üçün bir çox çətinliklər yaradır.
Vətəndən uzaqda təhsil alan Nuray Həsənzadə özəl olaraq Ednews-a bildirib ki, xaricdə təhsil almaq nə qədər gözəl olsada təbii ki, bir o qədər də çətin və problemlidir.
“Xaricdə təhsil alan tələbələr evlərini ilk dəfə tərk edib, tamamilə başqa bir mühitə düşürlər. Bu zaman o, fərqli mühitə, adət- ənənəyə öyrəşənə qədər bir müddət adaptasiya dövründən keçməlidir. Başqa bir problem kimi ikinci növbədə dil problemini misal göstərmək olar. Həmin ölkənin danışıq dilini, gündəlik ifadələrini, hətta oz aralarında etdikləri zarafatlari öyrənmək biraz vaxt tələb edir.
Daha bir problemlərdən biri isə təhsil aldığınız universitetin diplomunun Azərbaycanda tanınmamasıdır ki, bu da sizin gələcəkdə iş imkanlarınızı məhdudlaşdıracaq. Çünki bəzi xarici ali təhsil müəssisələrinin Azərbaycanda diplomu tanınmır”.
N.Həsənzadə həmçinin qeyd edib ki, tələbələrin üzləşdiyi problemlərdən biri də təqaüd ala bilməməkdir.
“Çox təəsüf ki, bəzi xarici ölkələrdə tələbənin yaxşı akademik nəticə göstərməsinə baxmayaraq, heç bir təqaüd ilə təmin olunmur”.
Məsələ ilə bağlı Ednews-a danışan təhsil ekspertiElçin Əfəndi qeyd edib ki, xaricdə yaşayan tələbələrimizin ən böyük problemi yaşayıç yerləri ilə bağlıdır. Bəzən ev tapmaq həqiqətən də çətin olur, məsələn uzaqda yerləşit və ya qiyməti çox baha olur.
“Bu zaman evsizlik problemi ilə üzləşən tələbənin fikri ancaq ev tapmaqla məşğul olur və dərslərdən yayınır. Bu da ümumi akademik göstəricilərə təsir edir. Bundan əlavə problemlər aviabiletlərin baha olmasıdır, bu da vətənlərinə geri qayıtmaqda çətinlik törədir. Biletler baha olduğu üçün geri qayıda bilmirlər yaxud da geri qayıtdıqdan sonra təkrar təhsil aldıqları ölkəyə dönmək olmur.
Ekspert Azərbaycanda diplomların tanınmaması məsələsinə də aydınlıq gətirib.
“Tələbələr diplomlarının tanınması ilə bağlı problemləri həll etmək mütləq öncədən araşdırma aparmalıdırlar”.
Söhbət zamanı Elçin Əfəndi həmçinin qeyd edib ki, dövlət xətti ilə təhsil alan tələbələrə dövlət müəyyən dəstək verir və güzəştlər tətbiq edir.
“Xaricdə yaşamaq xərcləri istisna olmaqla, tələbələrin bütün xərcləri dövlət tərəfindən qarşılanır. Amma kimsə öz hesabına təhsil alırsa, əlbəttə onlar üçün hər hansı bir kömək bir o qədər real görünmür. Ancaq təhsil aldığı ölkədə diaspor nümayəndəliyindən və yaxud da səfirlikdən müəyyən dəstək ala bilər. Amma belə ümumilikdə daha çox məzh dövlət xətti ilə qəbul olanlara yardım olunur”.
Ekspert qeyd edib ki, hazırda təxminən 50.000 nəfərə yaxın xaricdə təhsil alan Azərbaycan vətəndaşı var.
“Bizim kifayət qədər xaricdə təhsil alan tələbələrimiz var. Bütün bu tələbələr də qeydiyyatdan keçib. Düşünürəm ki, aidiyyəti üzrə qurumlar bu uşaqlarla maraqlanmalıdırlar, kimə kömək lazımdırsa, ona yardım göstərilməlidir. Bu gələcək üçün dövlət və cəmiyyətimiz üçün məncə müsbət addım olar”.
Sevinc Kamalova