Türkiyədə 45 mindən çox insanın ölümünə səbəb olan zəlzələdən sonra Azərbaycanda çoxmərtəbəli binaların tikintisinin dayandırılması barədə bir çox təkliflər irəli sürülüb.
Milli Məclisin deputatı Vahid Əhmədov çıxışı zamanı Azərbaycanda doqquz mərtəbədən hündür yaşayış binalarının tikintisinin dayandırılacağı barədə fikirlər səsləndirib.
“Məndə olan məlumata görə, dövlətin bununla bağlı planları var. Plana əsasən, ölkə ərazisində doqquz mərtəbədən hündür binalar tikilməyəcək. Azərbaycan və Türkiyə ölkələri seysmik zonada yerləşdikləri üçün bu cür qərarların verilməsi normal haldır”.
Deputat eyni zamanda Bakının Baş planının təsdiq olunmasının vacibliyini vurğulayıb.
Məsələ ilə bağlı Ednews-a daşınmaz əmlak və inşaat üzrə ekspert Elnur Azadov danışıb. O, qeyd edib ki, Sovet hökuməti dövründə bütün ərazilərində və Azərbaycanda müəyyən elmi faktlara əsasən layihələr hazırlanırdı.
“Gördüyünüz beş, doqquz mərtəbələr və başqaları bu üsulla tikilib. Onlar o zaman seysmologiyanı təhlil edən tədqiqat institutları ilə inşaat və memarlıq sahəsində fəaliyyət göstərən elmi təhqiqat institutları arasında aparılan araşdırmaların nəticəsində hazırlanırdı. Sovet əraziləri seysmik zona olduğu üçün tikintilərin hamısı o zaman lahiyələndirilib və tikilirdi”.
Ekspertin Sovet dönəmində ən çox doqquz mərtəbəli binaların tikilməsi məsələsinə də aydınlıq gətirib.
“Bunun cavabı o zaman yanğın təhlükəsizliyini təmin etmək üçün idi. Yanğın söndürmə maşının qaldırma qüvvəsi yalnız doqquzuncu mərtəbəyə kimi idi. Hazırda texnologiya imkan verir ki, on altı mərtəbəli binalar tikilə bilər. Lakin tikinti zamanı bütün normativlərə riayət etmək mütləqdir ki, zəlzələlərə tab gətirsin”.
Əbülfət Baxşəli