“Sülhün Kökləri” təşkilatı Avropa Birliyindən dəstək məktubu qəbul edib.
Ednews xəbər verir ki, 4 aprel Beynəlxalq Mina Xəbərdarlığı və Mina Aksiyasına Yardım Günündə Beynəlxalq Avrasiya Mətbuat Fondunun rəsmi tərəfdaşı olan, dünyanın aparıcı təşkilatlarından biri “Sülhün Kökləri” təşkilatı Avropa Birliyinin ABŞ-dakı nümayəndəliyinin San Fransisko ofisindən dəstək məktubu alıb.
Məktubda təşkilatın qurucusu və rəhbəri Heidi Kuhnün “Minalardan Üzümlüklərə” (Mines to Vines) ideyası ilə dünyanın müxtəlif ölkələrində gördüyü işlərin yüksək qiymətləndirildiyi və bu fəaliyyətdə dəstəyin göstəriləcəyi qeyd olunub.
“Əziz Heidi,
Dünya Birləşmiş Millətlər Təşkilatının 4 aprel 2023-cü ildə Minalardan Təmizləmə üzrə Beynəlxalq Məlumatlandırma və Yardım Gününü qeyd etdiyinə görə, minalar haqqında məlumatlılığın artırılmasında və minalanmış ərazilərdə nəzərəçarpacaq tədbirlər görülməsində "Mines to Vines" vasitəsilə göstərdiyiniz liderlik xüsusiyyətlərinə və nailiyyətlərinizə, həmçinin yerli icmalara ümid və tərəqqi gətirməklə dünyanın müxtəlif yerlərində ilham qaynağı oldğunuza görə sizi təbrik etmək istərdim.
Napa Vadisi üzümçülərinin güclü dəstəyi ilə sizin və cəmiyyətin illər ərzində əldə etdiyi irəliləyiş həqiqətən diqqətəlayiqdir, lakin siz həmişə özünüz qeyd etdiyiniz kimi, ölkələri bu bəladan xilas etmək üçün hələ çox iş görməlisiniz.
Mən sizin təşəbbüsünüzün davamlı uğuruna, Avropa İttifaqının gələcək dəstəyi ilə bağlı müzakirələrimizi davam etdirməyi səbirsizliklə gözləyirəm.
Sizə dünyanı daha yaxşı və təhlükəsiz bir yerə çevirməkdə kömək etməkdə ən yaxşısını arzulayıram”,- deyə, məktubda qeyd olunub.
Bu xəbəri Heidi Kuhn BAMF prezidenti Umud Mirzəyevlə bölüşüb və bu məktubun gələcək fəaliyyətlərinə böyük stimul olduğunu qeyd edib. O, həmçinin, ən qısa zamanda Azərbaycanda da “Minalardan Üzümlüklərə” ideyasının icrasına başlamağı səbirsizliklə gözlədiyini vurğulayıb. “Sülhün Kökləri” təşkilatını fəaliyyətinin Avropa Birliyi tərəfindən qiymətləndirilməsi və qurumdan dəstək məktubu qəbul etməsi münasibətilə təbrik edən Umud Mirzəyev bu humanitar fəaliyyətə dəstək göstərən hər bir kəsə təşəkkürünü çatdırıb.
“Sülhün Kökləri” təşkilatı və Beynəlxalq Avrasiya Mətbuat Fondu (BAMF) uzun müddətdir ki, uğurlu əməkdaşlıq edir. 2022-ci il martın 1-4 tarixlərində Beynəlxalq Avrasiya Mətbuat Fondunun dəvəti və ANAMA-nın dəstəyi ilə Azərbaycana səfər edən Heidi Kuhn Qarabağda 8 ədəd tank əleyhinə minanın zərərsizləşdirilməsində iştirak edərək növbəti hədəfinin Qarabağın mina bəlasından azad olmasına yönələcəyi mesajını verdi. Ötən il aprelin 1-də Bakıda Azərbaycan Respublikası Hökuməti, ANAMA və BMT-nin İnkişaf Proqramının (UNDP) birgə təşkilatçılığı ilə keçirilən “Humanitar minatəmizləmə fəaliyyəti və dayanıqlı inkişaf məqsədləri” konfransında iki tərəfdaş təşkilat ilk dəfə olaraq qlobal mina probleminin 18-ci DİM kimi qəbul olunması təklifi ilə çıxış etdilər. Həmçinin, Heidi Kuhnün və BAMF prezidenti Umud Mirzəyevin birgə imzası ilə BMT-nin baş katibi cənab Antoniyo Quttereşə Azərbaycanın qlobal mina problemi və 18-ci DİM-in qəbul olunması təşəbbüsü ilə bağlı rəsmi məktub ünvanlandı.
Heidi Kuhn öz çıxışlarında, media resurslarında və sosial media hesablarında hər zaman Azərbaycanın mina probleminə həssas yanaşmış və daim ön plana çəkib.
Ölkə prezidentləri, BMT liderləri, konqresmenlər, Roma Papası kimi önəmli şəxslər tərəfindən dəstəklənən xanım Kuhn demək olar ki, bütün görüşlərində Azərbaycanın adını çəkir və beynəlxalq ictimaiyyətin diqqətini ölkəmizə yönəltməyə çalışır. Son olaraq o Roma Papası Fransis ilə görüşü zamanı bu il iyunun 10-da Vatikanda BAMF ilə birlikdə ortaq tədbir keçirmək üçün razılıq aldığını da ictimaiyyətlə paylaşıb.
Oğuz