Azərbaycanın hüquq müdafiə QHT-ləri əsgərlərimizlə bağlı beynəxalq ictimaiyyətə müraciət ünvanlayıb. 

Ednews xəbər verir ki, bu gün Azərbaycanda fəaliyyət göstərən hüquq müdafiə təşkilatları və bir sıra QHT-lər Ermənistan mediasında yayılmış Azərbaycan Silahlı Qüvvələrinin hərbi qulluqçusunun işgəncə və qeyri-insani rəftara məruz qalması ilə bağlı foto və video materiallarla iclas keçiriblər. 

Onlar beynəlxalq təşkilatlara və ədalət keşiyində dayanan qurumlara müraciət ünvanlayaraq dünya ictimaiyyətini Azərbaycan əsgərlərinə qarşı qeyri-insani və təhqiramiz hərəkətlərə səssiz qalmamağa çağırıblar. 

Beynəlxalq Avrasiya Mətbuat Fondunun ofisində keçirilən tədbirdə bəyanatın mətni səsləndirilib və əsgərlərimizin erməni mediasında yayımlanan həssas görünütüləri nümayiş etdirilib. 

Bəyanatda Ermənistan tərəfinin beynəlxalq hüquq norma və prinsiplərini, Cenevrə Konvensiyasını kobud şəkildə pozduğu və bunun qarşısının alınması və təcili tədbirlərin görülməsi xüsusi olaraq qeyd olunub. 

QHT-lər aidiyyəti beynəlxalq təşkilatlara müraciət  edərək, bu fakta reaksiya verməyə və  Ermənistanı beynəlxalq hüquqla üzərinə götürdüyü tələblərə riayət etməyə çağırıblar.

Bəyanatın tam mətnini təqdim edirik:

“Azərbaycan QHT-lərinin 2 Azərbaycan əsgərinin əsr düşməsi və qeyri-insani rəftarla bağlı beynəlxalq ictimaiyyətə müraciəti

Azərbaycanın QHT icması Azərbaycan və Ermənistan arasında sülhün və sabitliyin bərqərar olması istiqamətində işlər görülməsini səbirsizliklə gözləyirdi. Azərbaycana qarşı illərlə davam edən təcavüzlərə baxmayaraq, biz barışığa hər zaman sadiq qalmışıq və qalırıq. Lakin Ermənistanın davamlı təxribatları yekun sülh sazişinin imzalanmasını maneçilik törədir və bu səbəbdən də iki ölkə arasında sülh məsələsi hələ də həllini tapmır. Erməni mina terroru demək olar ki, hər həftə günahsız Azərbaycan vətəndaşlarının həyatına son qoyur. Sərhəd ərazilərində 10 noyabr 2020-ci il tarixli üçtərəfli bəyanatı kobud şəkildə pozan çoxsaylı təxribatlar da bu həssas prosesi təhlükə altında saxlayır.

Bu gün biz Azərbaycan və Ermənistan arasında gərginliyin daha da dərinləşdirə biləcək daha bir təhlükəli məsələyə görə öz səsimizi qaldırırıq. Bu həftənin əvvəlində 2 Azərbaycan əsgəri pis hava şəraitində itkin düşüb və Ermənistan hakimiyyəti bu əsgərlərin onların nəzarətində olduğunu təsdiqləyib.

Lakin, sonra erməni mətbuatında bu əsgərlərin işgəncəyə məruz qalması ilə bağlı görüntülər ortaya çıxıb. Onların döyülməsinə və alçaldılmasına dair təkzibolunmaz sübutlar var. Ermənistan hakimiyyəti nəinki Cenevrə Konvensiyalarını açıq-aşkar pozur, hətta hazırda sosial şəbəkələrdə yayılan müvafiq kadrlarla və həmin əsgərlərlə tamamilə biabırçı şəkildə rəftarları ilə qürur duyurlar.

Biz müvafiq beynəlxalq təşkilatları və ədalət keşiyində duran qurumları insan hüquqlarına və beynəlxalq humanitar hüquqa bu qeyri-bərabər hörmətsizlik qarşısında səssiz qalmamağa, bu məsələ başda olmaqla, növbəti faciələrin qarşısını almaq üçün təcili tədbirlər görməyə çağırırıq. Həmçinin qeyd edək ki, oxşar hallarda erməni hərbçilər səhvən Azərbaycan ərazilərinə daxil olduqda, onlar tez və zərərsiz şəkildə geri qaytarılıb.

Biz, sizdən hər iki Azərbaycan vətəndaşının sağ-salamat vətənlərinə qayıtmalarına köməklik göstərməyinizi xahiş edirik”.

Qeyd edək ki, məsələ ilə bağlı XİN-Ermənistanda əsir götürülmüş Azərbaycan hərbçisinə zorakılıqla bağlı beynəlxalq təşkilatları məlumatlandırıb.

Qərbi Azərbaycan İcması Ermənistanda Azərbaycan hərbçisinə işgəncə verilməsini pisləyib.

Həmçinin səfirlik və beynəlxalq təşkilatlar da məsələ ilə bağlı mövqelərini bildiriblər.

Avropa İttifaqı- Aİ səfiri Peter Mixalko ötən gün tvitter paylaşımında yayılan videonun olduqca acınacaqlı olduğunu bildirib.

“Mən saxlanılmış azərbaycanlı əsgərə qarşı zorakı münasibətin əks olunduğu videonu gördüm. Doğrudan da acınacaqlıdır. Bütün əsirlərə beynəlxalq humanitar hüquqa uyğun davranılması vacibdir”, - səfir qeyd edib.

Beynəlxalq Qızıl Xaç Komitəsi (BQXK) Ermənistanda saxlanılan iki Azərbaycan hərbçisinin məsələsi barədə məlumatlıdır.

ABŞ-ın Azərbaycandakı Səfirliyi də bu haqda məlumat yayıb

ABŞ Azərbaycan əsgərinə qarşı Ermənistanda törədilmiş zorakılığa görə çox narahatdır.

“Biz Azərbaycan və Ermənistanı bütün məsələləri sülh danışıqları yolu ilə həll etməyə çağırırıq”, - məlumatda deyilir.

Böyük Britaniyanın Azərbaycandakı səfiri Fergus Auld də qeyd edib ki, Ermənistanda Azərbaycan əsgərinə qarşı edilən zorakılıqla bağlı yayılmış videonu izləmək dəhşətlidir.

"Beynəlxalq humanitar hüquq qanunlarına görə bu cür rəftar yolverilməzdir. Regionda dayanıqlı sülhə nail olmaq üçün bu kimi hallar pislənməlidir".

Oğuz