Xəbər verdiyimiz kimi, Hollandiyada irqçi “Qərbin İslamlaşmasına Qarşı Vətənpərvər Avropalılar” (PEGIDA) hərəkatının lideri Edvin Vaqensveld paytaxt Amsterdamda müsəlmanların müqəddəs kitabı olan Quranı cırıb. Daha sonra o, "bir qrupu təhqir etdiyi" üçün Hollandiya Prokurorluğuna ifadə verdiyini və fikrini ifadə etməyin ən yaxşı yolunun Quranı yenidən cırmaq olduğunu bildirib.
Məsələyə mövqe bildirən ilahiyyatçı Tural İrfan Ednews-a təəssüflə bildirdi ki, Qurani-Kərimin yandırılması ənənəsi Qərb tərəfindən qoyuldu. Bəzi Qərb ölkələri buna şərait yaratdı.
“Qurani-Kərim müsəlman aləminin müqəddəs kitabıdır. Quranı yandırmaq bütün müsəlmanları yandırmaq deməkdir. Çünki müsəlmanlar o kitabı ailəsindən, canından artıq sevir və hörmət edir. Qərbin İslam aləminə təlqin etməyə çalışdığı demokratik dəyərlərə əks addımdır bu əməl. Bu əməl demokratiyadan sui-istifadə halıdır. Təxribatdır. Səlib yürüşlərini bərpa etmək üçün zəmin hazırlamaqdır. Müqəddəs kitabı yandırmaq böyük günah və ən qatı cinayətdir. Müsəlmanlar heç zaman Tövrata, İncilə qarşı belə etməyiblər”.
T.İrfan sonda qeyd etdi ki, Qurani-Kərimi cırmaq, bilərək yandırmaq, təhqir etmək bütün İslam dünyasını aşağılamaq deməkdir.
“Məqsədlərdən biri də müsəlmanların nəbzini yoxlamaqdır. Hər bir halda bu iş tolerantlığa zidd, radikalizm, müsəlmanları təxribata çəkmək cəhdidir. Hesab edirəm ki, bu əməlin törədilməsinin əsl səbəbləri baş verdiyi dövlət tərəfindən ciddi təhqiq olunmalı və səbəbkarları, icraçıları, sifarişçiləri qanunla cəzalanmalıdır”.
Xatırladaq ki, “Vətənpərvər Avropalılar Qərbin İslamlaşmasına Qarşı” (PEGIDA) hərəkatının lideri Edvin Vaqensveld yanvarın 22-də Haaqa şəhərində polisin mühafizəsi altında müvəqqəti Hollandiya parlamentinin binası qarşısında, fevralın 13-də isə Utrext şəhərində keçirdiyi nümayişdə Qurani-Kərimi cırmışdı.
Oğuz