Son dövrlərdə valideynlər daha çox özəl baxçalara üstünlük verir. Buna səbəb kimi onlar qeyd edirlər ki, bu baxçalarda 24 saat nəzarət sistemi var. Belə ki, hər bir valideyn istədiyi zaman kamera vasitəsilə övladının hər addımını izləyə bilər.
Lakin dövlət baxçalarında bu mexanizm işləmir. Bəzi valideynlər iddia edirlər ki, dövlət baxçalarında tərbiyəçilər övladlarına pis davranır və buna görə də azyaşlılar psixoloji travma alırlar.
Bəs , Niyə dövlət baxçalarında ciddi nəzarət yoxdur ?
İşə götürülən kadr psixoloji cəhətdən yoxlanılırmı ? Əgər yoxlanılırsa bu hal niyə davam edir ?
Məsələ ilə bağlı Ednews-a danışan təhsil eksperti Elçin Əfəndi qeyd edib ki, Müəyyən baxçalarda tərbiyəçilərin bu peşə üzrə təhsili olmasa da müxtəlif yollarla işə düzəlirlər . Təbii ki, bu da bəzi mənfi hallar ortaya çıxarır .
“Ölkədə 1692 dövlət baxçası fəaliyyət göstərir və burada 30 minə yaxın azyaşlı tərbiyə alır. Əlbəttə bu uşaqların hər birinin qidalanması və ya təhsil prossesi tam diqqətdə saxlanılmalıdır . Baxçalara nəzarət Təhsil Nazirliyinə verildiyi üçün artıq 1 ildən çoxdur ki, müəyyən işlər görülür . Amma hələdə çatışmamazlıqlar var“.
Ekspert düşünür ki, baxçalarda vahid dərs proqramı tətbiq olunmalıdır .
“Baxçalar Nazirlər kabinetinin tətbiq etdiyi qaydalara əsasən fəaliyət göstərməlidir. Eyni zamanda təhsil nazirliyi tərbiyəçi müəllim heyətini , baxça drektorlarını işə konkret müvafiq qərarlar əsasında qəbul etməlidir. Baxçaların infastrukturu yaxşılaşdırılmalıdır . Hazırda baxça drektoru və müəllimlərinin işə qəbulu ilə bağlı işlər görülür. Qarşıdakı dövr ərzində işə qəbul həyata keçiriləcək. Müəllimlərin psixoloji yoxlanışı da bura daxildir. Əlbəttə ki, burada nəzarət kameraları da olmalıdır“.
Psixoloq Gülnar Orucova isə qeyd edib ki, baxçaya işə götürülən heyət heç bir testdən keçmir. Psixoloq problemi həllini onları müəyyən testlərdən keçirərək işə götürməkdə görür .
“ Baxça tərbiyəçiləri imtahanla qəbul olmalıdırlar. Əgər onun psixologiyası o işi görməyə imkan vermirsə, əsəbləri yerində deyilsə, o insan uşaqlarla işləyə bilməz. Bəzən insanlar sırf pul qazanmaq üçün bu işlə məşğul olur, bu zaman aqressiya uşaqlara tərəf yönəlir”.
Mütəxəssis müşahidə kameraları haqqında da danışıb. O, qeyd edib ki, dövlət baxçalarında da səsli kamera olmalıdır
“Səssiz kameralar nəyə görə olmalıdır? Uşaq psixologiyasında səs tembrı çox önəmlidir. Kameralar səssiz olduqda uşaqlarla uca səs tembırındə danışılır və valideyndə bunu görmür”.
G.Orucova bəzi dövlət baxçalarında qeyri-qanuni ödənişlərin alındığını da deyib.
“Dövlət öz hesabına baxçalara uşaqları qəbul edir, lakin drektorlar valideynlərdən aylıq pul alır. Adın isə yemək pulu qoyurlar. Halbuki qida da dövlət hesabından qarşılanır“.
Qənbərova Səbinə