Aliment fondunun yaradılması məsələsi yenidən gündəmə gəlib. 

 

Ednews xəbər verir ki, Ali Məhkəmənin Mülki Kollegiyasının sədri Sənan Hacıyev “Nikahın xitamı ilə bağlı ailə qanunvericiliyinin tətbiqi sahəsində mövcud vəziyyət” mövzusunda keçirilən konfransda bu məsələyə toxunub.

 

Nikahın pozulması zamanı ortaya çıxan mübahisələrdən danışan S.Hacıyev aliment fondunun yaradılmasının zəruriliyini vurğulayıb.

 

Məsələ ilə bağlı danışan deputat Razi Nurullayev Ednews-a açıqlamasında aliment fondunun yaradılması barədə müzakirələrin davam etdiyini bildirib:

 

“Parlamentdə məruzə edərkən bu məsələ ilə bağlı təkliflərimi səsləndirmişdim. Milli Məclisin İnsan Hüquqları komitəsində bu məsələ hər zaman müzakirə olunub, eyni zamanda ombudsmanın məruzəsi zamanı da gündəmə gəlib. Aliment fondunun yaradılması vacibdir. Komitə iclaslarında hər zaman bu fikri dəstəkləmişik, buna ehtiyac var. Bu addımın həyata keçirilməsi üçün maliyyə mexanizmlərilə bağlı müddəalar müzakirə edilə bilər. Düşünürəm ki, aliment fondunun yaradılması boşanmış qadınlara övladlarının zəruri xərclərini qarşılamaq üçün kömək ola bilər”. 

 

 

Deputat Vahid Əhmədov isə bildirib ki, kişilərin ödəməli olduğu alimenti vaxtında verməməsi və ya ümumiyyətlə buna əməl etməməsi qadınları çətin vəziyyətə salır. O qeyd edib ki, aliment fondunun yaradılması ailələrin maddi sıxıntılarının qarşısını müəyyən qədər ala bilər:

 

 

“Aliment məsələsi ölkədə ciddi  problemə çevrilib. Vətəndaşlarla görüşlərimdə də hər dəfə bunun şahidi oluram. Ailədə ərlə arvad boşanandan sonra kişilər uşağın haqqı olan alimenti ödəmək istəmir, qadın qalır çətin vəziyyətdə. Hökumət uşaq pulu vermir, digər tərəfdən də qadınlar aliment ala bilmirlər. Uşağı böyütmək, xərclərini təmin etmək getdikcə çətinləşir, maddi sıxıntılar artır. Bu barədə Milli Məclisdə müzakirələr gedir. Təklif var ki, aliment fondu yaradılmalıdır. Aliment fondunun yaradılması ailələrin maddi sıxıntısının qarşısını müəyyən qədər ala bilər. Hesab edirəm ki, həm uşaq pulunun verilməsi, həm də aliment fondunun yaradılması müsbət addım olacaq, məsələni diqqətdə saxlamaq lazımdır”.

 

 

Törə Zeynal

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary