“Əl-Cəzirə” Media Şəbəkəsinin əsas qollarından biri Sənədli Filmlər Departamentinin icraçı direktoru Əhməd Məhfuz və Planlaşdırma və Tərtibləmə Şöbəsinin rəhbəri Adel Ksiksi Beynəlxalq Avrasiya Mətbuat Fondunun dəvəti ilə Azərbaycana səfərləri çərçivəsində CBC Arabic kanalına müsahibə veriblər.
Müsahibələri zamanı qonaqlar Azərbaycanla bağlı təəssüratlarını bölüşərək dəvət və qonaqpərvərliyə görə Avrasiya Mətbuat Fondunun Prezidenti Umud Mirzəyevə təşəkkürlərini bildiriblər.
“Beynəlxalq Avrasiya Mətbuat Fondunun Prezidenti cənab Umud Mirzəyevin dəvətilə bu gözəl ölkəyə səfər etdik. Hesab edirəm ki, müxtəlif əməkdaşlıq sahələrini əhatə edən bu ziyarətimiz uğurlu oldu və gələcəkdə də davam edəcək”, - deyə Əhməd Məhfuz qeyd edib.
Azərbaycanın ərəb ölkələri ilə inkişaf edən çoxşaxəli münasibətləri barədə danışan Əhməd Məhfuz əlavə edib ki, ölkəmiz bu gün ərəb və islam dünyasında mühüm siyasi və strateji mövqeyilə seçilir:
“Biz müxtəlif ölkələrin mədəniyyətinə işıq salırıq, xüsusən də ərəb və islam mədəniyyəti ilə sintez təşkil edən xalqların irsini tədqiq etmək bizim üçün önəmlidir. Azərbaycan bu baxımdan bizim üçün vacib ölkədir. Bu ölkəyə səfərimiz onun haqqında real məlumatlar toplamağımıza töhfə verdi”.
Adel Ksiksi isə öz növbəsində Azərbaycanın Mərkəzi Asiyanın mühüm və ayrılmaz hissəsi olduğunu vurğulayıb:
“Azərbaycan haqqında kitablarda, sosial şəbəkələrdə məlumatlarda tez-tez rast gəlirik, ölkəniz yaxından izləyirik. Azərbaycana ilk səfərimizdə bu ölkənin gözəlliyini, qədimliyini gördük. Səfər çərçivəsində erməni işğalından azad edilən ərazilərdə də olduq. Erməni vəhşiliyini, dağıdılmış tarixi məkanları öz gözlərimizlə gördük”.
Azərbaycanla ərəb dünyası arasındakı əlaqələrin inkişafını müsbət qiymətləndirən Adel Ksiksi bu əlaqələrin qədim tarixə malik olduğunu qeyd edib:
“Azərbaycanla ərəb, İslam ölkələri arasında münasibətlər daim mövcud olub. Əlaqələrin bütün sahələrində irəliləyiş var. Bu münasibətlər təkcə siyasi deyil, həm də iqtisadi və ticarət əlaqələrini əhatə edir. Bu da öz növbəsində digər əməkdaşlıqlar üçün açıq qapıdır. Ərəb ölkələrinin vətəndaşlarının Azərbaycan turizminə marağı böyükdür”.
Loğman Yunis