Qurban bayramına sayılı günlər qalıb.
Müqəddəs bayram ərəfəsində qurbanlar kəsilir, ehtiyacı olanlara paylanılır, dualar edilir. Bəziləri isə insanların saf niyyətindən istifadə edib, öz qanunsuz əməlləri ilə məşğul olur, bayram sevinclərini ürəklərində qoyurlar.
Bəli, söhbət qanunsuz heyvan kəsimi məntəqələrindən gedir.
Aidiyyatı qurumlar bayram ərəfəsində bu məkanlara nəzarəti gücləndirsə də, hər il anoloji hadisələr təkrarlanır. Sağlamlığımıza zərər vuran, qida təhlükəsizliyi standartlarına cavab verməyən kəsim və satış məntəqələri öz işini davam etdirir.
Məsələ ilə bağlı AQTA ilə əlaqə saxladıq. Qurumun mətbuat katibi İlkin Kərimov Ednews-a açıqlamasında bildirdi ki, yoxlamalar hər il mütəmadi aparılır.
“Həm illik plan, həm də vətəndaşlardan daxil olan şikayətlər əsasında monitorinqlərimizi davam etdiririk. Vətəndaşlar hər hansı neqativ hal aşkarlayarsa, Çağrı Mərkəzimizə zəng edib məlumat verə bilər. Heyvan kəsimi ilə bağlı yoxlamalar gündəlik əsasda aparılır. Saytımızda da bu barədə məlumatlar qeyd olunub. Cərimə, fəaliyyətin məhdudlaşdırılması kimi tədbirlərlə qanunsuz heyvan kəsiminin qarşısı alınır”.
İ.Kərimov qeyd etdi ki, tək AQTA deyil, digər aidiyyatı qurumlar da bu işdə fəaliyyət göstərir.
“Heyvan kəsiminin təmin edilməsi ilə bağlı Prezident Sərəncamı var. Daxili İşlər Nazirliyi və yerli icra hakimiyyəti orqanları ilə birgə buna nəzarət təmin edilir”.
Qurum rəsmisi onu da bildirdi ki, yaxın günlərdə vətəndaşlara kəsim və satış barədə dəqiq məlumat veriləcək.
“Qurban bayramı ərəfəsində məlumatlarımızı yeniləcəyik. Siyahı təsdiqlənir. Kəsim və satışın haralarda, hansı ünvanlarda olacağı barədə öncədən vətəndaşlara məlumat veriləcək”.
Törə Zeynal